3-с №-дээх Дьокуускай куорат балыыһатын инфекционист бырааһа Айталина Софронова бэлиэтииринэн, коронавирус дьаҥын утары быһыыны ыларга «ИФА», «ПЦР», «M и G иммуноглобулин» анаалыстары туттарар наадата суох.
«Сыстыганнаах дьаҥы утары быһыыны биэрии саҕаланыаҕыттан пандемия сотору кэминэн бүтүөҕэр эрэл үөскээтэ. Бастакы кэмҥэ вакцина аҕыйах буолан, ыалдьыбыт дьон «антителалаах» буолан ылымыахтарын син этэ. Былырыыҥҥы кэмҥэ тэҥнээтэххэ, судаарыстыба вакцинанан бэйэ нэһилиэнньэтин эрэ буолбакка, омук сиригэр тиийэ тарҕатар буолла. Онон маассабай быһыыны ылыахха наада. Субу-субу харчы төлүү-төлүү анаалыс туттарыахтааҕар, быһыыны биирдэ туруортаран кэбиһэр ордук», — диэн инфекционист-быраас Айталина Софронова сүбэлиир.
3-с №-дээх Дьокуускай балыыһатыгар быһыыны 08:00-20:00 чааска диэри өрөбүлэ уонна тохтобула суох ылыахха сөп. Маны таһынан, Лермонтов уул., 121, Хатас нэһилиэгэр Каландарашвили уул., 4/2, Табаҕаҕа Строительнай уул., 31, Эргэ Табаҕаҕа Лесная уул., 12 быһыы туруораллар.
Манна эбии быһыыны көһө сылдьар маннык пууннарга туруораллар: «Проспект» атыы-эргиэн дьиэтигэр, «АЗИЯ» ТРК, Д.К. Сивцев-Суорун Омоллоон аатынан опера уонна балет тыйаатырыгар, Эстрада тыйаатырыгар, «Мин докумуоннарым» офиска (Дьокуускай к., Аммосов уул., 18).
Дьиэҕэ олорор дьон быһыыны 88002005454 уонна 506421 төлөпүөннэргэ эрийэн сайаапкалаһан туруортарыахтарын сөп.
Елена ПОТОЦКАЯ, «Саха сирэ» хаһыат, edersaas.ru