Сүрүн Уопсастыба

Чуукаарга саҥардыллыбыт Кыайыы болуоссата арылынна

Бу күннэргэ Ньурба улууһун сэттэ тойон томтор мырааннаах «Чулуу Чуукаар» диэнинэн биллэр нэһилиэгэр үйэлээх тэрээһин ыытылынна.

Бу туһунан биһиги уопсастыбаннай кэрэспэндьиэммит Лэкээрин Сэргэн Ил бу курдук иһитиннэрдэ: «Аҕам саастаах дьон дэкээдэлэрин түмүктээн, Аҕа дойду Улуу сэриитин кыттыылаахтарыгар уонна үлэ, тыыл фронун бэтэрээннэригэр аналлаах Улуу Кыайыы сылыгар анаммыт Чуукаар Кубалааҕар олохтоохтор “Мантан сэриигэ барбыттара” диэн ааттаах-суоллаах ытык миэстэни эбэн-ситэрэн биэрдилэр. Ол курдук, сэрии кыттыылаахтарын ааттара-суоллара мэҥэ тааска үйэтитилиннэ».

Норуот көҕүлээһининэн саҥардыллан тутуллубут Чуукаар нэһилиэгэр холкуостар бөдөҥсүйүүлэригэр сүҥкэн кылааттаах, бэрэссэдээтэл, Аҕа дойду Улуу сэриитин кыттыылааҕа Николай Степанов аатынан Кыайыы болуоссатын үөрүүлээх арыллыыта буолла. Болуоссат аһыллыытыгар эрдэттэн бары санитарнай ирдэбили тутуһан, тэрээһин сиэрин-туомун кэтэхтэн устан, киинэ таҥан оҥордубут. Кыайыы болуоссатын аалай кыһыл лиэнтэтин нэһилиэк салалтата уонна Николай Степанов сиэн балта, урбаанньыт Ирина Федорова кырыйдылар.

Нэһилиэк баһылыга Владимир Степанов күнү-дьылы аахсыбакка төрөөбүт дойду тупса сайдарын тутуһар сүҥкэн кылааттарын киллэрсибит нэһилиэк олохтоох уолаттарыгар Гаврил Сергеевка, Аким Сергеевка, Айталин Семеновка, Иван Степановка, Степан Михайловка, Тит Мартыновка, Дьулусхан Прокопьевка, Василий Босоевка махтал суруктары туттартаата.

Кыайыы болуоссатын аһыллыытын нэһилиэк олохтоохторо онлайн-эрэсииминэн ютубка көрдүлэр. Дьон-сэргэ сүргэтэ көтөҕүлүннэ. Киэһэ халлаан хараҥарыыта Н.С.Степанов аатынан Кыайыы болуоссата “Чахчы, Чулуу Чуукаардарбыт…” диэбиттии, уота-күөһэ сандаарбыта көрүөхтэн кэрэ көстүү буолан, киһи дууһатыгар истиҥ иэйиини, төрөөбүт дойдунан киэн туттуу санаатын уһугуннарда.

Нэһилиэк бары олохтоохторугар, күүс-көмө буолбут бар дьоммутугар, нэһилиэк култуурунай-уопсастыбаннай олоҕор көхтөөхтүк кыттааччыларга махтанабыт!

Елена ПОТОЦКАЯ, «Саха сирэ» хаһыат, edersaas ru

1
0

Добавить комментарий