«Агростартап» куонкуруһугар быйыл Муома улууһуттан түөрт киһи кыттыбыта.
Кинилэртэн Уйгулаана Громова уонна Ганза Уваровскай грант кыайыылаахтара буоллулар. Ганза Муома улууһун Чыыбааҕылаах нэһилиэгин төрүт олохтооҕо. Кыра сааһыттан Дьөһөгөй оҕотун иитиигэ сыстыбыт.
– Бизнес-бырайыакпын көмүскүүргэ мин эрдэттэн бэлэмнэммитим, нэһилиэккэ сылгыны иитии төһө кэскиллээх буолуон сөбүн үөрэппитим, – диир Ганза. – Биһиэхэ сылгы хаһыытыгар олус үчүгэй, иҥэмтиэтинэн баай боруу от үүнэр. Билигин бэйэм 25 сылгылаахпын, онтон аҕыһа биэ. Сылгым ахсаанын сыллата эбэн, 2026 сылга барыта 111, ол иһигэр 86 биэлэнэргэ былаанныыбын. Граным харчытынан 35 сылгыны (8 биэни, 22 тыһы тыйы уонна атыыры) атыылаһыам. Ону Дьааҥыттан уонна Муома улууһун П.Корякина бааһынай хаһаайыстыбатыттан ыларга барыллаан кэпсэтэн турабын. Киинтэн ыраах буоламмыт, сүрүн ороскуоппут уматыгы уонна сылгы бурдугун тиэйэн илдьии буолар. Базам Кулун Өлбүттэн 120 км сиргэ баар, кыһын «Буранынан», сайын мотуордаах оҥочонон сылдьабыт.
Раиса Сибирякова, «Саха сирэ», edersaas.ru