Чыскыырай Лондоҥҥа тахсыбыт виниловай пластинкатын уонна самоизоляцияҕа олоруу туһунан
Кимиэхэ да маарыннаабат, бэйэтэ ураты суоллаах-иистээх, этно-джаз истиилинэн толорор саха ырыаһыта Валентина Романова-Чыскыырай өссө уонтан тахса сыллааҕыта SOAS университетын ыҥырыытынан Лондоҥҥа тиийэн, маастар-кылаастары биэрбитэ.
Онно, биллэн турар, олохтоох мусукааннары кытта сибээс олохтоммута, композициялар даҕаны суруллубуттара…
Оттон быйыл, бу соторутааҕыта Великобританияҕа Чыскыырай саҥа виниловай пластинката атыыга тахсыбыт диэн сонуну истэн, эҕэрдэлээри уонна, онно ханнык ырыалара киирбиттэрин, өссө туох былааннардааҕын ыйыталаһаары, кинилиин төлөпүөннэһэ сырыттым.
— Пластинканы Лондоҥҥа мин мененджерым Миша Мальцев таһаарда. Манна, үксэ Куорсуннаах айымньыларыгар суруйбут ырыаларым киирдилэр — «Мөккүөр”, “Түүл”.., онтон да атыттар. Үөрдүм аҕай, биллэн турар… Айар куттаах киһи виниловай пластинката күн сирин көрөрө –дьол! Виниловай пластинка диэн – хаачыстыба буоллаҕа. Ырыа үчүгэйдик иһиллэрин дьон сөбүлүүр. Коллекционердар эмиэ винилы күндүркэтэллэр.
—Дьокуускайга пластинкан атыыланар дуу?
—Манна аҕыйах кэлбитэ… Барыта кэриэтэ Великобританияҕа атыыга тахсыбыта.
—Оттон дьоҥҥо пластинканы истэр проигрывателлээхтэрэ буолуо дуо?
—Дьэ ким билэр… Миэхэ бэйэбэр суох…
—Валентина, элбэх киһи: “Ааспыт ааспат амтана” телесериалга Чыскыырай олус үчүгэйдик, истиҥник оонньуур, артыыс талааннаах кыыс…”,— диирин истэбит. Киинэҕэ өссө туох былааннар баалларый?
—Махтал. Киинэҕэ оонньуурбун олус сөбүлүүбүн.
“НВК”-лар миигин сериалга, Култуура, искусство колледжын дириэктэрэ Захар Никитин сүбэтинэн, ыҥырбыттар этэ. Үөрүүнэн сөбүлэспитим. Билигин биир киинэҕэ сүрүн оруолга уһулуннум. Бу саҥа киинэ эһиил киинэ тыйаатырдарыгар көрдөрүллүөҕэ, презентацияланыаҕа.
—Артыыстар билигин “удаленкаҕа” көһөн үлэлии олордоххут… Киинэҕэ уһулуннум диэтиҥ уонна өссө туох сөбүлүүр дьарыктааххыный?
—Удаленнай үлэҕэ көспүппүт… Дьиэ кэргэммин харыстыыр кыһалҕатыгар сылдьабын. Кэргэним ийэтэ саастаах, ол иһин кими да мунньубаппыт, бэйэбит да онно-манна мээнэ сылдьыбаппыт.
Билигин даачаҕа дьарыгым – сибэкки, оҕуруот. Айар үлэҕэ былаан элбэх, саҥаны көрдүү сатыы сылдьабын.
Бар дьоммор ДЬОЛУ, ТАПТАЛЫ, ДОРУОБУЙАНЫ баҕарабын. Вирустан харыстаныҥ!
Татьяна МАРКОВА.
Хаартыскалар Валентина Романова альбомуттан уонна интернеттэн.