Валентина Романова -Чыскыырай Asia Pacific Screen Awards диэн 14-с төгүлүн ыытыллар бириэмийэҕэ «Бастыҥ артыыс” диэн номинацияҕа түһэрилиннэ. Бу бириэмийэ Азия-Тиихэй акыйаан эрэгийиэнигэр биир бастыҥнар кэккэлэригэр сылдьар. Этэргэ дылы, «Оскар» бириэмийэтигэр тэҥнээх. Номинацияҕа түһэриллибиттэр Азия-Тиихэй акыйааннааҕы киинэ академиятын чилиэнинэн буолаллар.
Валентина Николаевна суотабайыгар эрийэн ыйыталаспыппытыгар: «Пугало» диэн киинэҕэ уһуллубут оруолбунан номинацияҕа түһэрилинним. Кыайыылаахтары анал хамыыһыйа сэтинньигэ быһаарар», — диэн иһитиннэрдэ.
Түгэнинэн туһанан, «Сахамедиа» РИИХ кэлэктиибин аатыттан Валентина Николаевнаны үрдүк ситиһиитинэн итиитик-истиҥник эҕэрдэлиибит. Барыта этэҥҥэ быһаарылыннын диэн алгыс тылбытын тиэрдэбит.
Ыспыраапка:
Валентина Романова-Чыскыырай 1971 сыллаахха бэс ыйын 12 күнүгэр Чурапчы улууһун Мындаҕаайы сэлиэнньэтигэр төрөөбүтэ. 2016 сыллаахха «Көтөбүн» диэн моноиспэктээкилин көрөөччүлэр дьүүллэригэр таһаарбыта. 2020 сыллаахха Дмитрий Давыдов «Пугало» («Чыычый куттабыл») киинэҕэ сүрүн оруолу толорбута. 2020 сыл түмүгүнэн, «Белый слон» диэн киинэ кириитиктэрин уонна киинэ прессатын национальнай бириэмийэтигэр «Дьахтар бастыҥ оруола» диэн номинацияҕа кыайыылаах буолбута.
edersaas.ru