Кыһын саҕаланна эрэ Тымныы оҕонньор Великий Устюг куоракка баар дьиэтиттэн тахсан, киэҥ Арассыыйа устун айанныыр, оҕолорго умнуллубат көрсүһүүлэри бэлэхтиир. Холобур, кыһын саҕаланар сириттэн – Тымныы полюһуттан кэлэн Кыһын бэлиэтин Чысхаантан ылан барар уонна ыйы быһа дойду устун айанныыр.
Чысхаан улуустарынан сылдьан, Саҥа дьыллааҕы тур чэрчитинэн, оҕолору, дьону-сэргэни кытары көрсөрө былааннанар. Ол курдук, ахсынньы 21 күнүгэр Хаҥаласка, 22-23 күннэригэр Ленскэйгэ, 24 күнүгэр Өлүөхүмэҕэ сылдьыаҕа.
Кини сыл аайы ханнык улуустарга барарын бэйэтэ талар. Тиийбит сиригэр оскуолаларга, оҕо саадтарыгар, култуура кииннэригэр сылдьар. Чысхаан бу саҥа дьыллааҕы айана “Экология туһугар бары бииргэ!” диэн акция чэрчитинэн ыытыллар. Тымныы полюһун хаһаайына хоту сир уйан айылҕатын, ирбэт тоҥун харыстыыр, дьоҥҥо оннук санааны тиэрдэр сыаллаах-соруктаах.
Оҕолор Чысхаан кэлэрин эрдэттэн кэтэһэн уруһуйдарын, өйтөн суруйууларын, араас оҥоһуктарын бэлмнииллэр. Бу оҥоһуктара кыһыҥҥы каникул кэмигэр Дьокуускайга «Үрүҥ туллук» айар түмсүү киинигэр уонна кулун тутарга “Өймөкөөн – Тымныы полюһа” бэстибээл кэмигэр быыстапкаҕа туруохтара.
Бу иннинэ Чысхаан Бүлүү умнаһын уонна илин эҥэр улуустарыгар сылдьыбыта. Онно экологическай акциялары ыытан, «Кыыс Амманы харыстыаҕыҥ» диэн ыҥырыы таһааран, илии баттааһыннары хомуйбута.
Саҥа дьыл чугаһаатаҕын ахсын, хас биирдиибит остуоруйа дьиктитигэр итҕэйэр курдукпут. Баҕа санаабытын этэбит, ыраастанабыт, эргэттэн босхолонобут, дьоҥҥо үтүөнү оҥоробут. Үүнэр сылга ол барыта туоларыгар баҕарабыт. Чысхаан айана аһымал санааны, үтүө дьыаланы, кыамматтарга көмөнү оҥорору, тулалыыр эйгэни харыстааһыны тарҕатар, үксэтэр кыахтааҕар итэҕэйэбит.
Ангелина ВАСИЛЬЕВА, “Саха сирэ” хаһыат, edersaas.ru