«Чысхаан» торт, хаар куоска, Тымныы моруос оҕонньор муннуга — Саҥа дьыллааҕы бэлэх

Бу күннэргэ Саҥа Дьылга бэлэмнэнэн, батсаабынан киһини соһутар уонна кэрэхсэтэр араас хаартыска кэлэр.

edersaas.ru

Саамай кэрэхсэбиллээҕэ, Саҥа дьыл тиэмэтигэр дьон араас оҥоһуктары бэйэлэрин эт илиилэринэн, толкуйдарынан оҥорор буолан, ол киһи болҕомтотун ордук тардар.

Бу көрөр хаарынан оҥоһуктары Уус Алдан улууһун 2 №-дээх Мүрү орто оскуолатын үөрэнээччилэрэ төрөппүттэрин кытта оҥорбуттар.

— Оскуолабыт дириэктэрэ Сергей Фомин көҕүлээһининэн  бастакы куонкуруска оҕолор төрөппүттэрин кытта олус көхтөөхтүк кытыннылар. Кылаастарга биир ый иннинэ сорудах биэрбиппит. Онон бу оҥоһуктар оҕолору уонна төрөппүттэри көхтөөх буоларга сомоҕолоотулар. Оттон оскуолабыт таһа соҕотохто Саҥа дьыллааҕы тыыннана түстэ,-— диэн санаатын үллэстэр оскуола дириэктэрин иитэр үлэҕэ солбуйааччы Василий Руфов.

Уопсайа хаартан оҥоһуллубут 20 араас остуоруйа дьоруойа оскуола таһын киэргэтэн, ыалдьыттары ыраахтан угуйа тураллара — аптаах көстүү!

Тэрилтэлэр Саҥа дьыллааҕы остуоруйа алыбын дьоҥҥо бэлэхтииргэ эмиэ дьулуһаллар. Дьокуускайга Норуоттар доҕордоһууларын дьиэтин айар үлэһиттэрэ куорат олохтоохторугар уонна ыалдьыттарыгар анаан бу күннэргэ «Тымныы Моруос оҕонньор резиденцията» диэн аптаах кэрэ муннуктары арыйдылар.

Ол курдук, биэс араас ис хоһоонноох Саҥа дьыллааҕы тиэмэҕэ анаммыт муннуктарга ким баҕалаах кэлэн 2018 сылы көрсүү умнуллубат түгэнин хаартыскаҕа  үйэтитэн барыан сөп.

Оттон Тымныы полюһун олохтооҕо Ульяна Кондакова киһи тылынан сатаан эппэт дьикти минньигэс тортары оҥорон, биир дойдулаахтарын күндүлүүр эбит. Бу көстөр тортар ханнык баҕарар бырааһынньыктааҕы мааны остуол киэргэлинэн буолуон сөптөөхтөр.

Чысхаан уонна Өймөкөөн тымныыта  — Ульяна өссө оскуолаҕа муода тыйаатырын үлэлэтиэҕиттэн кини үлэтин сүрүн ис хоһооно.

— Ульяна Кондакова араас ис хоһоонноох тортары оҥорор буолбута уонча сыл буолла. Бэйэтэ айар куттаах буолан, кини араас ойууну бу баардыы бурдук аска ойуулуура — туспа искусство,— диэн бэлиэтиир Өймөкөөн улууһун Томтор нэһилиэгин олохтооҕо Валентина Прокопьева.

Дьэ, ити курдук, куорат, улуус, нэһилиэк аайы талааннаах дьоммут араас ис хоһоонноох  оҥоһуктары хаарынан, ынах сааҕынан, бурдугунан, быһата, ким хайдах тугу толкуйдуурунан Саҥа дьыл тиэмэтигэр айбыт-туппут үлэлэрин биһиги социальнай ситимнэр нөҥүө истэ-билэ олоробут. Кинилэр  бары бэйэлэрин оҥоһуктарыгар дууһаларын ууран, биһиэхэ: «Кэлэн иһэр Саҥа дьылынан!» — диэн эҕэрдэлэрин ыыталлар.  

Елена ПОТОЦКАЯ, «Саха сирэ» хаһыат, edersaas.ru