«Чысхаан» кулууп хайыһардьыттара Ижевскэйтэн күрэхтэһэн кэллилэр

Ижевскэйгэ, Удмуртия киин куоратыгар «Спорт — олох нуормата» федеральнай бырайыак чэрчитинэн хайыһар успуордун таптааччылар икки ардыларыгар ыытыллар Бүтүн Арассыыйатааҕы кыһыҥҥы спортивнай оонньуулар иккис күрэстэрэ буолан ааста.

Арассыыйа араас куораттарыгар икки сылга биирдэ ыытыллар оонньуу бырагырааматыгар успуорт сэттэ көрүҥэ киирэр. Саха Өрөспүүбүлүкэтигэр тэриллибит “Чысхаан” успуорт кулуубун хамаандата иккис төгүлүн бу оонньууларга кыттар. Бу сырыыга барыта 37 эрэгийиэнтэн 368 спортсмен кытынна. Кинилэр истэригэр норуоттар икки ардыларынааҕы кылаастаах успуорт алта маастардара, 103 успуорт маастара, 36 успуорт маастарыгар хандьыдаат уонна 139 бастакы разрядтаах спортсменнар кытыннылар. Бастакы икки күн классическай уонна көҥүл стилинэн хайыһар буолла, үһүс күн эстафеталар ыытыллыбыттара уонна бүтэһик күҥҥэ  уһун дистанцияҕа классическай стилинэн сүүрүү буолан ааспыта.

Бастакы оонньууларга Саха сирин хамаандата 42 эрэгийиэн спортсменнарын кытта күрэхтэһэн 14-с миэстэҕэ тиксибиттэрэ. Бу сырыыга уопсай ахсааҥҥа 10-с миэстэҕэ тахсан көрдөрүүлэрин биллэ тупсардылар. Күрэс үһүс күнүгэр хамаандалар истэригэр ахсыстаан иһэн түмүктүүр уһун дистанцияҕа сүүрүү кэнниттэн онус кэккэҕэ тэбиллибиттэрэ. Ол да буоллар, хамаанда бэйэтин түмүгүн астына ылынна – туох да диэбит иһин ааспыт сыллааҕы көрдөрүүлэрин тупсаран дойдуларыгар төнүннүлэр.

“Чысхаан” успуорт кулуубун чилиэнэ Екатерина Семеновна Никитина Удмуртияттан кэлбит хамаанда түмүктэрин туһунан бу курдук кэпсээтэ:

— Биһиги хамаандабыт тоҕус дьахтартан уонна аҕыс эр киһиттэн турар. Ол иһигэр 4 успуорт маастара, 2 маастарга хандьыдаат бааллар. Бу сырыыга, хомойуох иһин, бириистээх миэстэҕэ тиксибэтибит. Бастакы оонньууларга икки боруонса мэтээли ылбыппыт. Күрэхтэһии хас биирдии күнэ 10 бастыҥ көрдөрүүлэринэн түмүк таһаарыллар. Хамаанда суотугар кыайыыны чугаһатар очукуолары эстафетаҕа кыттыбыт хамаандалар, дьахталлар уонна бэтэрээн эр дьон аҕаллылар. Таарыйан эттэххэ, бэтэрээн кыттааччыларбыт истэригэр үс киһи 80 саастарын ааспыт аксакаллар.

Саамай элбэх очукуону хамаандаҕа  Екатерина Павлова аҕалла, бэйэтин саастыылаахтарын бөлөҕөр иккитэ төрдүстээтэ. Биирдэ үһүс миэстэттэн баара суоҕа 11 сөкүүндэ арыттаах кэлбитэ. Кини бэйэтин кэмигэр Арассыыйа үс төгүллээх чөмпүйүөнэ.

Оонньуулар Ижевскэй куорат Г.А.Кулакова аатынан спортивнай-чэбдигирдэр комплексыгар аастылар. Үрдүк таһымнаах норуоттар икки ардыларынааҕы стандартка эппиэттиир хайыһар трассата баар. Биһиэхэ, “хаптаҕай сир хайыһардьыттарыгар” туора ыстаныылаах сыыртан түһүүлэр уонна үрдүккэ дабайыылар ордук уустук буоллулар. Уопсайынан, Саха сиригэр тымныы буолан хайыһар сезона сүрүннээн саҕалана илик, оттон атын эрэгийиэннэргэ хайыһар сезона сабыллара чугаһаан сылдьар кэмэ, ити улахан охсуулаах буолла. Үгүс күөн көрсүбүт хайыһардьыттарбыт спортивнай туруктарын чыпчаалыгар сылдьаллар этэ.

2024 сылга Сыктывкарга Маастардар Аан дойдутааҕы куубагар күрэс (успуорду таптааччылар ортолоругар аан дойду чөмпүйэнээтэ) ааһыахтаах. Онно кыттарга 2023 сылга Уһук Илиҥҥи федеральнай уокурук талар күрэхтэһиитин ааһыахтаахпыт. Онон биир күрэс түмүктэннэ, атыттар саҕаланнылар – өрөспүүбүлүкэ иһигэр кыттааччылары талар түһүмэх саҕаланыаҕа.

«Саха сирэ» хаһыат, edersaas.ru

Хаартыска “Чысхаан” успуорт кулуубуттан