Дьокуускай куоракка дьаҥтан харыстанарга кэтэр маасканы ыарахан сыанаҕа атыылыыр аптека баар эбит.
Билигин сирэйгэ кэтэр харысхал мааската суох харыс да хамсаабаккын. Ханна бар да “Без маски не входить!” , “Без масок не обслуживаем !” диэн биллэрии бөҕөтө. Мааскабыт сыаната да араас буолар.
Мааскаттан сылтаан 202 микроойуоҥҥа баар 4-с оҕо поликлиникатыгар бастакы этээһигэр баар аптека туһунан суруйарга сананным.
Ол гынан баран бу аптекаҕа сыана сөхтөрдө. Кыһалҕаттан 22 (сүүрбэ икки) солкуобайдаах маасканы ылан кэттибит.
Тоҕо маннык ыарахан сыаналааҕын атыыһыт кыайан быһаарбата. “Биһиэхэ үөһээттэн итинник дьаһал”, — диэтэ.
Хайыахпыный, үҥсүү тэтэрээтигэр санаабын суруйдум.
Оттон бу поликлиника 2 этээһигэр маасканы 6 солкуобайга атыылыы туралларын көрөн, соһуйдум.
Бу аптека Петр Алексеев аатынан уулусса 73/2 аадырыһыгар баар муниципальнай аптекаҕа бас бэринэр эбит. Атыыһыт биэрбит 318-808 нүөмэригэр эрийэн бу табаар сыанатын ыйыталастым.
Онно: “Былырыын хамсык саҕаланыыта бу мааскалары итинник ыарахан сыанаҕа ылбыппыт. Атыылаһар (закупочнай) сыанабыт итиччэ. Онтубут бүтэ илик. Ол иһин сыаната итинник”, — диэн буҕаалтыр хоруйдаата. “Биһигини куорат мээрийэтэ хонтуруоллуур”, — диэн эбэн эттэ.
Төһө кырдьыгын билбэтим. Баҕар, ол урукку сыананан сирэйдэнэн, чэпчэки да сыаналаах табаары, эми-тому ыарахан сыанаҕа батарыахтарын эмиэ сөп.
Ханнык баҕарар тэрилтэҕэ киирбит үҥсүү сурукка эппиэт бэриллиэхтээх. Хомойуох иһин, муниципальнай аптека туох да хоруйу ыыппата.
Онон сибээстээн, куорат салалтата бу хамсык уустук кэмигэр аптекалар үлэлэрин төһө хонтуруолга ыларын билиэхпин баҕарабын.
Бу үүммүт 2021 сыл сурукка, аатыгар эрэ Чэбдигирии сыла буолбатар ханнык.
Тамара Винокурова, биэнсийэлээх
Хаартыска: ааптар тиксэрдэ