Чымынаайылар Төрүт Сокуоҥҥа уларытыылары киллэриини өйүүллэр
Арассыыйа олохтоохторугар барыларыгар улахан быһаарыылаах куоластааһын саҕаланна. Ааспыт үйэ 90-ус сылларыгар ылыллыбыт Төрүт Сокуон эргэрбитин, аныгы олох ирдэбилигэр эппиэттэспэт буолбутун үгүс киһи бэлиэтиир.
Хас биирдии киһи сүрүн быраабын мэктиэлиир Төрүт Сокуон туһунан Таатта улууһун Чымынаайытын олохтоохторо бу курдук санааларын тиэрдэллэр.
Олег Арылахов, Таатта улууһун Чымынаайы бөһүөлэгин олохтооҕо:
— Арассыыйа устуоруйатын билигин араастаан токурутан кэпсииллэр, оттон Төрүт Сокуоҥҥа киириэхтээх уларытыыга дойдубут устуоруйатын кырдьыктаахтык көрдөрүөххэйиҥ диэн этиини киллэрдилэр. Ол аата баһааҕырдар, сымыйанан токурутар үлэни бопсуохтара.
Ону таһынан, урут даҕаны оҕону иитиигэ-үөрэтиигэ судаарыстыба кыһаллар этэ. Төрүт Сокуоҥҥа оҕо сайдарыгар, улаатарыгар судаарыстыба сөптөөх усулуобуйаны тэрийиэхтээх диэн чопчу сурулунна уонна дьиэ кэргэни өйүүллэрин биллэрдилэр. Оҕолоох эдэр ыалга билигин хаһааҥҥытааҕар да араас көмө оҥоһуллар, дьиэлэнэргэ усулуобуйа тэриллэр.
Тус бэйэм биэнсийэлээх киһи буоларым быһыытынан, биэнсийэ сыл аайы эбиллэн иһиэхтээҕин Төрүт Сокуоҥҥа киллэрбиттэрин биһирээтим. Биллэрин курдук, сыана күн-түүн ыараан иһэр, онон маннык быһаарыныы саамай сөптөөх дии саныыбын.
Итинник уларыйыылар киирдэхтэринэ, кэнэҕэс көлүөнэ сайдарыгар, олоҕо тупсарыгар төһүү күүс буолуо.
Антонина Григорьева, Таатта улууһун Чымынаайы бөһүөлэгин олохтооҕо:
— Төрүт Сокуоҥҥа киирбит уларыйыылар биһиги олохпутугар көмөлөөх-көмүскэллээх буолуохтара диэн толору эрэнэбин.
Биһиги өрөспүүбүлүкэбит Ил Дарханын Айсен Николаев тула түмсэммит, сахалар бары көхтөөхтүк куоластыы кэлиэххэйиҥ диэн ыҥырабын.
Эдуард Куприянов, Таатта улууһун Чымынаайы бөһүөлэгин олохтооҕо:
— Бу куоластааһыҥҥа Төрүт Сокуону уларытар быһаарыылаах кэмҥэ мин эмиэ куоластыырга сананным. Алын кээмэйтэн итэҕэһэ суох хамнаһы, сыл аайы эбиллэ турар биэнсийэни, социальнай көмөнү мэктиэлиир Төрүт Сокуону ылыныахпытын наада.
От ыйын 1 күнүгэр бары көхтөөхтүк кэлэн куоластыыргытыгар ыҥырабын.
edersaas.ru