Уопсастыба

Чычымахха Кыайыы болуоссата саҥардылынна

Тааттаҕа, Чычымах олохтоохторо, Кыайыы болуоссата саҥардыллыбытыттан улаханнык сэргэхсийэн олороллор. «Быйыл Улуу Кыайыы 75 , Арассыыйаҕа Албан аат, Саха сиригэр Ийэ дойдуга бэриниилээх буолуу сылларынан бэйэбит уолаттарбыт дьоһун бэлэҕи оҥорон улаханнык үөртүлэр», — дииллэр кинилэр.

Бу туһунан сиһилии нэһилиэк баһылыга Степан Соров  маннык кэпсиир:

— Нэһилиэкпитигэр Кыайыы болуоссата тутуллуоҕуттан, туох да өрөмүөн үлэтэ ыытылла илик этэ. Онтон дьэ, быйыл саҥардыллан, улахан сэргэхсийии буолла. Барыбыт баҕа санаабыт туолла. Саас-сааһынан сырдаттахха, 2019 сыллаахха олохтоох көҕүлээһини өйүүр бырагыраамаҕа (ППМИ) кыттыбыппыт. Ол түмүгэр, Улуу Кыайыы 75 сылын көрсө, нэһилиэкпитигэр Кыайыы болуоссатын саҥардан оҥорууга субсидия ылбыппыт.

Биллэриллибит аукциоҥҥа кыайыылааҕынан тахсыбыт урбаанньыт Аркадий Павлович Миронов биригээдэтэ үлэни чахчы олус кыһанан, үрдүк хаачыстыбалаахтык толордо. Санаабытын таптылар.

ССРС култууратын туйгуна, Арассыыйа худуоһунньуктарын сойууһун чилиэнэ, Саха сирин норуодунай худуоһунньуга, улахан ааттаах-суоллаах скульптор Максим Максимович Павлов  чочуйбут пааматынньыга уонна ол олоҕо керамическай билиитэнэн бүрүлүннэ. Оттон икки өртүгэр холкуостартан уоттаах сэрии толоонугар ыҥырыллыбыт уонна онно сырдык тыыннарын толук уурбут хоодуот буойуттар ааттара-суоллара толору суруллубут истиэндэтэ кэчигирээтэ. Маны сэргэ, үлэ фронугар, тыылга сырдыктаах хараҥаны ыпсаран үлэлээн Улуу Кыайыыны уһансыбыт ытык дьоммутугар,  бэтэрээннэрбитигэр аналлаах стела уонна хорсун быһыы, Кыайыы бэлиэтэ — биэс салаалаах сулус харахха тута быраҕыллаллар. Болуоссат силигин сиэдэрэй күрүө ситэрэр-хоторор.  Оттон манна киэһээҥҥи хараҥаны прожектор уота халбарытар. Саҥардыллыбыт болуоссакка сыл ахсын эргиччи сибэккилэр олордуллаллар. Манна дьоннорун ахтан-санаан аһаары кэлбит дьон-сэргэ кырасыабай оҥоһуулаах ыскамыайкаларга олорон дуоһуйа сынньаныахтара, — диир чахчы да киэн туттан, үөрэн туран.

Түмүккэ, гранит билиитэлэри оҥотторууга бэтэрээннэр оҕолоро-уруулара, аймахтара бэйэлэрин үптэринэн-харчыларынан көмөлөһөн улахан өйөбүл буолбуттарыгар махтанна. Маны сэргэ, субуотунньуктары тэрийэн көмөлөспүт, сүбэ-ама  буолбут дойдулаахтарыгар бука барыларыгар,  Кыайыы болуоссатын саҥардан оҥорууга туох баар кыһамньыларын уурбут, ис дууһаларыттан үлэлээбит Аркадий Павлович Мироновка, Валерий Валерьевич Павловка, Семен Семенович Решетниковка нэһилиэк бары олохтоохторун уонна тус бэйэтин аатыттан дириҥ махталын тиэртэ. «Төрөөбүт дойдуларыгыр бэриниилээх дьонноох буоламмыт, нэһилиэкпит киэркэйэр, сайдар», — диэтэ.

Степан Соров хаартыскаларга түһэриитэ

 

 

1
0

Добавить комментарий