Таатта улууһун Чычымаҕар түөлбэлэринэн спортивнай күрэхтэһии буолла.
edersaas.ru
Аҕыс түһүмэхтээх ким күүстээҕин, быһыйын, сымсатын тургутан көрдөрөр күрэскэ эр бэртэрэ илин-кэлин түһүстүлэр.
Бэрт эрийсиилээх күрэхтэһии кэнниттэн «Эрэл» түөлбэ — бастакы, иккис — «Чычымах», «Мэҥкээйи» — үһүс, «Амгинскай» төрдүс миэстэлэри ыллылар.
«Мэҥкээйи» түөлбэ олохтооҕо, оскуола буҕаалтыра Саргылан Тистяхов күрэстэргэ өрүү инники кэккэҕэ сырытта.
Эрдэттэн биллэриллибит хаартыска күрэһэр Николай Иванов уонна Николай Табунанов үлэлэрэ биһирэннэ. Маны тэҥэ Клавдия Попова нэһилиэкпит эр дьону Сэбиэскэй Аармыйа кэккэтгэр сулууспалаабыт дьон байыаннай таҥастарын, хаартыска альбомнарын хомуйан, быыстапка тэрийбитэ бэрт сонуннук көһүннэ.
Түөлбэлэрбит эр дьонноро бары биир киһи курдук ох курдук оҥостон кэлэн, нэһилиэк биир улахан тэрээһинигэр кыттан, бэрт түмсүүлээхтэрин көрдөрдүлэр.
Халлаан сылыйан, сотору кэминэн эр дьоҥҥо булт абылаҥа саҕаланыаҕа. Онуоха сөп түбэһиннэрэн эр дьоҥҥо, булка, күннээҕи олоххо, үлэҕэ аналлаах сүүйүүлээх мал-сал латырыайата оонньонно. Ким тарбаҕар талааннаах сүүйэн, дьиэтигэр өттүк харалаах, илии тутуурдаах барда. Сүрүн бирииһи — сааны нэһилиэк баһылыга Степан Соров сүүйэн, үөрүү өрөгөйүн биллэ.
Сомоҕолоһуу сылынан сибээстээн, Чычымах нэһилиэгин олохтоохторо бу курдук үгүс тэрээһиннэри түмсүүлээхтик ыытар былааннаахпыт.
Марианна РЕШЕТНИКОВА,
Таатта улууһа, Чычымах нэһилиэгэ.
«Саха сирэ» хаһыат, edersaas.ru