Мэҥэ Хаҥалас саамай кытыы Чыамайыкы нэһилиэгэр быйылгы кыстык этэҥҥэ баран иһэр.
Сүөһүлэригэр сыл тахсар отторо тиийэр. Ону ааһан 250 туонна оту улуус нэһилиэктэригэр атыылаабыттар. Онон атын хаһаайыстыбалар сыл тахсалларыгар сүрдээх көмөнү оҥорбуттар. Атын нэһилиэктэр хаһаайыстыбалара күһүн от үлэтэ үмүрүйээтин кытта тута кэлэн дуогабардаһан, харчыларын төлөспүттэр уонна кыһын суол турбутун кэннэ тиэйбиттэр.
Быйыл нэһилиэк сиригэр-уотугар бөрөлөр бааллара бэлиэтэммит. Ол курдук, үс бөрөһүт Геннадий Филиппов, Семен Уткин, Егор Дьячковскай ардай аһыылаахтары бултаһаллар. Билиҥҥи туругунан 2 бөрөнү хапкаанынан бултаабыттар.
Кытыы нэһилиэк саамай кыһалҕалаах боппуруоһунан интэриниэт суоҕа буолар. Оскуола үөрэнээччилэрэ СМС нөҥүө үөрэнэргэ күһэллибиттэр. Саайт нөҥүө куоластааһыҥҥа 16 нэһилиэк иһигэр хапсыбыттар, онон интэриниэт киирэр ини диэн олохтоохтор бүк эрэнэллэр. Бу туһунан биһиэхэ нэһилиэк баһылыга Егор Прокопьев иһитиннэрдэ.
Женни Стрюкова
Хаартысканы Е.Прокопьев ыытта