Сэтинньи 18 күнэ – Тымныы оҕонньор төрөөбүт күнэ.
edersaas.ru
Бу бэлиэ күн Ньурба улууһун Чуукаар нэһилиэгэр куйаар ситиминэн Тымныы Оҕонньор уонна Хаарчаана ыалдьыттаан ааспыттарын туһунан Култуура дьиэтин уус-уран үлэһитэ Лэкээрин Сэргэн бу курдук кэпсиир:
— Алын сүһүөх кылаас оҕолоро уонна “Ымыычаан” оҕо саадын иитиллээччилэрэ ZOOM сыһыарыынан быһа биэриигэ Тымныы оҕонньорго хоһоон аахтылар.
Хаарчаана эһээтин таһырдьа көрсөөрү, харыйаны симээн көһүтэ сылдьарын оҕолор быһа биэриигэ көрөн, үөрдүлэр аҕай.
Оҕолор Тымныы оҕонньору ыҥырбыттарыгар, эһээлэрэ кулуупка киирэн, кэлэн иһэр саргылаах Саҥа Дьылынан эҕэрдэлээтэ. Төһө да куйаар ситиминэн буоллар, кырачаан чуукаардар, Саҥа дьыллааҕы тэрээһини дуоһуйа көрбүттэрэ биһигини, тэрийээччилэри, эмиэ олус үөртэ, дууһабытын астыннарда.
Оҕолор Тымныы Оҕонньортон: «Саҥа Дьыл алыптаах киэһэтигэр cотору хайаан да кэлээр, кэһиигин аҕалаар», — диэн көрдөһө хааллылар.
… Ити курдук, төһө да дьиэҕэ олордорбут, култуура үлэһиттэрэ кырачаан биир дойдулаахтарыгар куйаар нөҥүө бырааһынньыктааҕы бэртээхэй бэлэҕи ууннулар.
Елена ПОТОЦКАЯ, «Саха сирэ» хаһыат, edersaas.ru