Саҥа Дьылы көрсө улуустарга араас тэрээһиннэр ыытылла тураллар.
edersaas.ru
Ньурба улууһун Чуукаарыгар туох тэрээһиннэр ыытылла туралларын уопсастыбаннай кэрэспэдьиэн Сэргэн Лэкээрин иһитиннэрэр:
— Чуукаардааҕы Е.М. Поликарпов аатынан “Эйгэ” норуот айымньытын уонна спорт киинэ 2021 сылга тохсунньу 1 күнүгэр билигин үлэлии олорор дьиэтигэр киирбитэ 35 сылын туолар. Бу үбүлүөйдээх тэрээһини, төһө да дьону кулууп дьиэҕэ мунньар көҥүллэммэтэҕин иһин, тустаах үлэһиттэр үбүлүөйдээх Саҥа дьыл бырааһынньыктарын куйаар ситиминэн үрдүк таһымҥа ыытардыы бэлэмнэнэллэр.
Күн аайы бу тэрээһиннэргэ бэлэмнэнии буолар буолан, култуура үлэһиттэрэ Саҥа дьыл тыынын билбиппит быданнаата.
Бу күннэргэ нэһилиэк олохтоохторо “Үтүө санаа харыйата” аахсыйаҕа актыыбынайдык кытталлар.
Ол курдук, маҕаһыыҥҥа кэлбит киһи бэйэтин ис санаатыттан доруобуйаларыгар хааччахтаах, элбэх оҕолоох ыаллар кырачааннарын үөрдэр соруктаах бэйэтин тус бэлэҕин харыйа анныгар ууран хаалларар.
Маны сэргэ, нэһилиэк 5 түөлбэтэ Саҥа дьылы көрсө “Түөлбэм мааны түбэтэ” диэн Тымныы оҕонньору уонна Хаарчаананы көрсөр миэстэлэрин бэлэмнии сылдьаллар.
Саҥа Дьыллааҕы бырааһынньыктар тохсунньу аҕыс күннээх сынньалаҥын тухары куйаар ситиминэн тохтоло суох ыытыллыахтара.
Тэрээһиннэргэ нэһилиэк олохтоохторо Чуукаартан төрүттээх дьону кытта «быһа эпииргэ» көрсөн, нэһилиэкпит сайдыытыгар туһуламмыт санааларын атастаһыахтара.
