Саҥа дьылы кытта аптаах, туох эрэ уратылаах кэми сибээстиибит.
edersaas.ru
Ньурба улууһун Чуукаардааҕы Е.М. Поликарпов аатынан “Эйгэ” норуот айар киинин үлэһиттэрэ аптаах-алыптаах күннэри нэһилиэк олохтоохторугар бэлэхтиир кэмнэрин үгэнэ. Бу туһунан киин уус-уран салайааччыта Сэргэн Лэкээрин иһитиннэрэр:
— Тымныы оҕонньор уонна Хаарчаана доҕотторунаан кэлэр сыл бэлиэтин Оҕуһу сиэппитинэн, аптаах холбуйаҕа “Үтүө санаа харыйата” аахсыйаттан киирбит бэлэхтэри элбэх оҕолоох 60-тан тахса ыалга, тыыл уонна үлэ бэтээннэригэр, соҕотох олорор нэһилиэк олохтоохторугар түҥэттибит.
“Түөлбэм мааны Саҥа дьыллааҕы түбэтэ” диэн күөн күрэскэ кыттан, нэһилиэк 5 түөлбэтэ саҥа үүнэр сылы көрсө киһи хараҕа хайгыы, сөҕө-махтайа көрөр гына киэргэппиттэр.
Бу киэргэтиини көрүү кэмигэр хас биирдии түөлбэ өссө бырааһынньыктааҕы нүөмэрдэри бэлэхтээн, Тымныы оҕонньору уонна Хаарчаананы үөртүлэр, дууһаларын сылаанньыттылар.
Ама, маннык үчүгэй түгэни быһа биэриинэн көрө олорон, Саҥа дьыл алыбыгар ким ылларыа суоҕай!
Түгэнинэн туһанан, нэһилиэкпит олохтоохторугар уонна түөлбэ салайааччыларыгар бары ыытыллар тэрээһиннэргэ көхтөөх кыттыыларын иһин дириҥ махталбытын тиэрдэбит!
Елена ПОТОЦКАЯ, «Саха сирэ» хаһыат, edersaas.ru