Чуукаардар куйаарынан испэктээк көрөөрү олороллор...
Олох-дьаһах

Чуукаардар куйаарынан испэктээк көрөөрү олороллор

Сыстыганнаах дьаҥынан сибээстээн, дьиэҕэ бүгэн олорбуппут тохсус ыйыгар барда.

edersaas.ru

Бу кэм устата куйаар ситимин нөҥүө үлэлиир, үөрэнэр, ас сакаастаан аһыыр, таҥас таҥнар, култуурунайдык сынньанар буоллубут.  Быһата,  урут «олохпут —виртуальнай…» диэн күлэн этэр буоллахпытына, билигин оннук олоххо кэлэн олоробут.

Кэрэхсэбиллээҕэ баар, култуура үлэһиттэрэ иллэҥ кэммитин араас интэриэһинэй тэрээһиннэри ыытан сэргэхситэллэр. Холобур, Ньурба улууһун Чуукаар нэһилиэгэ бэрт сэргэх тэрээһиннэри тэрийэр. Ол курдук, соторутааҕыта нэһилиэк оҕолоро куйаар нөҥүө Тымныы оҕонньор төрөөбүт күнүн бэлиэтээбиттэрэ. Аны аҕыйах хонугунан олохтоохтор испэктээк көрөөрү кэтэһэ сылдьаллар эбит.

Бу олус актыыбынай дьон туһунан култуура үлэһитэ Лэкээрин Сэргэн маннык кэпсиир:

— Чуукаардааҕы Е.М. Поликарпов аатынан “Эйгэ” норуот айымньытын уонна спорт киинэ саҥа сүүрээн ирдэбилин толору баһылаан, тэрээһиннэри куйаар ситимин араас платформатыгар кыайа тутан ыыталлар.

Маны сэргэ, бэйэлэрин үлэлэрин уопутун өрөспүүбүлүкэ араас муннуктарыгар үлэлиир биир идэлээхтэрин кытта үөрэ-көтө үллэстэллэр. Ол курдук, куйаар нөҥүө төлөбүрдээх кэнсиэрдэри оҥорууга, саайтка үлэҕэ, счетчик туруорууга маастар-кылаастары ыыттылар.

Оттон нэһилиэк олохтоохторо куйаар ситимигэр олохтоох Култуура дьиэтэ таһаарар сонуннарын анаан күүтэллэр.

Бу кэлэр нэдиэлэ сэрэдэтигэр, сэтинньи 25 күнүгэр,  С.Н. Каратаев-Ырыа Дыгыйар “Тоҥ Саар Бухатыыр” олоҥхотун култуура уонна спорт кииннэрин үлэһиттэрэ быһа тардан туруоралларын (бэйэтэ киинэ!) олохтоохтор долгуйа кэтэһэллэр.

Бу курдук уустук кэмҥэ араас интэриэһинэй тэрээһини тобулар үлэлээх дьон биир дойдулаахтарын санааларын өрө көтөҕөн, өрүү түбүгүрэ сылдьаллар.

Елена ПОТОЦКАЯ, «Cаха сирэ» хаһыат, edersaas.ru

Хаартыска: Чуукаардааҕы Е.М. Поликарпов аатынан “Эйгэ” норуот айымньытын  архыыбыттан

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

11 − один =