Ньурба улууһун Чуукаар нэһилиэгин олохтоохторо дьаһалталарын көҕүлээһининэн нэһилиэккэ баар бары кыһалҕаны быһаарар инниттэн “Модун” эр дьон түмсүүтүн тэрийбиттэрэ.
Бу туһунан Чуукаартан Сэргэн Лэкээрин иһитиннэрэр: «Соторутааҕыта «модуннар» Эбэ Күөлэ уута иҥнин, баран хаалбатын диэн соруктаах быһыты өрөмүөннүү субуотунньукка таҕыстылар. Эбэ Күөлэ — нэһилиэк ытык сирдэриттэн биирдэстэрэ. Аата мээнэ ааттаммат. Үһүйээн этэринэн, сэттэ кыталык кыыс кута олохсуйбут Тойон Мыраан кэрэ көстүүлээх ытык миэстэтэ.
Кырдьык, билигин да, урут да нэһилиэнньэ ыраас иһэр уунан аһаан-сиэн, киһи буолан, өбүгэ төрүт үгэһинэн сүөһү ииттэн кэллэхтэрэ. Хомойуох иһин, кыһын ыраас ууну ыраастаан таһаарар ыстаансыйа баһаартан эмсэҕэлээн, билигин нэһилиэнньэ муус уутунан аһаан олорор. Бу күннэргэ улуус дьаһалтатын хамыыһыйата ууну ыраастаан таһаарар ыстаансыйаны көрөн-үөрэтэн барбыттара. Суол алдьаныан иннинэ өрөмүөннэнэн, уу ыстаансыйаҕа олохтоох эр дьон күүһүнэн сөргүтүлүннэ. Чуукаарга Эбэ күөлүн уута бу кыһын уута уола сыһан, улахан аймалҕаны, кыһалҕаны таһаара сыста. “Модун” эр дьон түмсүүтэ хаста да дьаһалтаҕа мустан, дьүүллэһэн баран, сүбэлэрин холбоон, аһатар Эбэбит уута уолбатын туһугар субуотунньук тэрийдилэр.
Бу курдук нэһилиэк эр дьоно түмсэн баар кыһалҕаны үрдүттэн быһаара сырыттахтарына, нэһилиэкпит эрэллээх илиигэ баара биллэр буоллаҕа».
Елена ПОТОЦКАЯ, «Саха сирэ» хаһыат, edersaas.ru