Чурапчыттан үүрүллүбүт саха сүөһүлэрэ Аммаҕа саҥа хотоҥҥо кыстыахтара
Саха төрүт сүөһүтүн дьылҕата ыйааһын бэскитигэр турарын бары даҕаны истэ-билэ сылдьабыт. Төһө сириэдийэрэ эбэтэр симэлийэрэ – үлэ дьонун илиитин иһигэр баар. Маннык сир саарбах кэмҥэ Амма Болугуруттан үтүө сонун кэлбитэ үс бүк үөрүүлээх: сүүсчэ саха сүөһүтэ быйылгы кыстыкка саҥа хотоҥҥо киирдэ.
Санатан эттэххэ, саха сүөһүтүн иитиинэн дьарыктанар «Тускул» генофонда питомнигын исписэлиистэрэ – сүрүн зоотехник Андрей Турантаев уонна селекционер-зоотехник Степан Заровняев быйыл сайын Чурапчы Үрэх Күөрэтиттэн Одьулуун нэһилиэгэ кыайан көрбөккө аккаастаабыт 81 сүөһүтүн үс КамАЗ массыынаҕа тиэйэннэр, Амма улууһун дьаһалтатын туруорсуутунан Болугур нэһилиэгин олохтоохторугар Любовь уонна Трофим Окороковтарга илдьэн туттарбыттара.
Ити этиллибит 81 сүөһүгэ сайын Чурапчы алаастарыгар бырах барбыт ыччат сүөһүлэр эбиллэннэр итиэннэ «тускуллар» Уус Алдан Сыырдааҕыттан 9 сүөһүнү эбии аҕалан биэрэннэр, Окороковтарга билигин 98 төбө турар. Трофим Окороков «Тускул» ГП Болугурдааҕы салаатын сэбиэдиссэйэ дуоһунастаах, үс үлэһиттээх.
Трофим Окороков (хаҥастан төрдүс) тутуу биригээдэтин уолаттарын кытта
Трофим Трофимович: «Саҥа хотоммут бөһүөлэктэн түөрт биэрэстэлээх сиргэ турар. Алексей Максимов салалтатынан түөрт киһилээх биригээдэ 45 х 9,5 миэтэрэ иэннээх хотону далын, кыбыытын кытта балаҕан ыйын 10 күнүттэн саҕалаан алтынньы ортотугар бүтэрдэ. Мин ИП-бэр пилорамалаахпын уонна тырахтарыыстаахпын. Икки уол мас хайыттарыытыгар сырытта», – диэн кэпсээтэ уонна изовертан, изоспантан, тоһоҕоттон ураты тутуу матырыйаалын бэйэтэ уйуммутун эттэ.
Трофим Окороковтыын сайын кэпсэтэрбитигэр кини саха сүөһүтүн бөһүөлэктэн түөрт көс тэйиччи сытар Күллэги үрэххэ сайылатан баран, онно үргүлдьү кыстык хотон туттар былааннааҕын эппитэ. Ол былаанын эһиил хайаан даҕаны олоххо киллэрэр бигэ санаалаах. «Оччоҕо бу саҥа туттубут хотоҥҥун хайыыгын?» – диэн ыйыппыппар: «Бөһүөлэктэн чугас база кимиэхэ баҕарар наада буолуо», – диэтэ.
Василий НИКИФОРОВ, «Саха сирэ» хаһыат, edersaas.ru