Ыраах учаастарынан оттуур 108 мобильнай биригээдэ барыта холбоон 3537 туонна кэбиһиилэннилэр.
Бүгүҥҥү күннээх чахчынан, өрөспүүбүлүкэ үрдүнэн 108 мобильнай биригээдэ оттуу сылдьар. Ити иһиттэн Ньурбаҕа 25, Чурапчыга 21, Хаҥаласка 20, Бүлүүгэ 13, Сунтаарга уонна Мэҥэ Хаҥаласка уоннуу, Уус Маайаҕа үс мобильнай биригээдэлэр тэриллибиттэр. Кинилэр барыта холбоон 3537 туонна оту оттоотулар.
Чурапчы улууһуттан Амур уобалаһын Зея оройуонугар биэстии киһилээх икки мобильнай биригээдэ оттуу барда. Ол курдук, Хоптоҕо нэһилиэгиттэн Иннокентий Осипов салайар биригээдэтэ атырдьах ыйын 9 күнүгэр барда.
Сылаҥ нэһилиэгиттэн Михаил Макаров салайар биригэдэтэ бу күннэргэ айанныаҕа. Кинилэр холбоон 2400 туонна оту бэлэмниир соруктаахтар. Бу туһунан Тыа хаһаайыстыбатын министиэристибэтэ иһитиннэрэр.
Раиса Сибирякова.