Балаҕан ыйын 29 күнүгэр киин куоракка ыытыллыбыт «Мусукаалынай дьиэ кэргэн» өрөспүүбүлүкэтээҕи бастакы аһаҕас куонкуруска 30 дьиэ кэргэн кыттыбытыттан чаҕылхайдык кыайан, Чурапчы улууһун Уһун-Күөл сэлиэнньэтиттэн «Халлааҥҥа үрдэл» рок-бөлөх Гран-при хаһаайынынан буолла!
Түөрт уол оҕолоох Борисовтар дьиэ кэргэттэрэ Чурапчы улууһун Сылаҥыгар олорор. Ыал аҕата Айсен Гаврильевич Борисов идэтинэн баһаартан куттал суох буолуутун тиэхиньигэ, баһаарынай чааска үлэлиир. Ийэлэрэ Варвара Гаврильевна оскуола кылаабынай буҕаалтыра.
Бу дьиэ кэргэн уратыта – ийэлээх аҕалара бэйэлэрэ гитараҕа, хомуска, кырыымпаҕа, о.д.а. араас мусукаалынай инструменнарга оонньуулларын сөбүлүүр буоланнар, оҕолорун кыра эрдэхтэриттэн муусуканы таптыырга иитэллэр. Биллэн турар, тыа оҕолоро үлэҕэ-хамнаска эмиэ үөрүйэхтэр – сайын төрөппүттэринээн от оттууллар, мас мастыыллар, күһүн муус ылсаллар, онтон да атын дьиэ ис-тас үлэлэригэр көмөлөһөллөр. Оттон иллэҥ кэмнэригэр дуобаттыыллар, араас видео уонна сайыннарар оонньуулары оонньууллар, муусуканан дьарыктаналлар.
«Халлааҥҥа үрдэл» рок-бөлөх профессор Г.П.Башарин аатынан Сылаҥ орто оскуолатыгар 2009 сыллаахха тэриллибитэ. Сүрүн састаапка ким баарын сэрэйдэххит буолуо — Роберт Борисов, 9-с кылаас – бас-гитара, вокал; Саша Борисов, 7-с кылаас — ритм -гитара, ударнайдар, вокал; Ганя Борисов, 6 –с кылаас – соло-гитара, вокал; Антон Борисов, 6-с кылаас – соло- гитара. Бөлөх ситиһиитин сыллата хаҥатан иһэр. Ол курдук, холобур, 2014 с. “Табык” норуоттар икки ардыларынааҕы этническэй рок-муусука бэстибээлигэр “Бэстибээл арыйыыта” буолбута. 2015 с. Дьокуускайга II Өрөспүүбүлүкэтээҕи оскуолалар рок-бөлөхтөрүн бэстибээлигэр Гран-при ылары ситиспитэ. 2016 с. “Азия оҕолорун” култуурунай бырагырааматыгар кыттыбыта. 2017 с. оҕолорго ВИА өрөспүүбүлүкэтээҕи куонкурустарыгар I ист. лауреат, Антон Борисов —«Бастыҥ соло-гитарист», Роберт Борисов – «ОКЕАН» (Владивосток) Оҕо киинигэр путевка. 2017 с. Үөһээ Бүлүүгэ ыытыллыбыт «Манчаары оонньууларын» култуурунай бырагырааматынан «Хотой-айыы» этно-рок бэстибээлгэ ыҥырыллан, кыттыбыта. Быйыл, 2018 с. Хаҥалас улууһугар ыытыллыбыт «Ой дуораана» Өрөспүүбүлүкэтээҕи тыыннаах муусука куонкуруһугар Гран-при хаһаайына буолбута. Рок-бөлөх салайааччыта – Борисовтар аҕалара Айсен Гаврильевич.
Онон, бу күннэргэ «Халлааҥҥа үрдэл» рок-бөлөх ситиһиитин өссө хаҥатта – өрөспүүбүлүкэҕэ “Бастыҥ мусукаалынай дьэ кэргэн” аатын ылла.
Уолаттарга бу үрдүк наҕараадаларын бастакы бэрэсидьиэммит, “Муусука — барыбытыгар” бырайыагы көҕүлээччи, тэрийээччи Михаил Ефимович Николаев туттарда. Эҕэрдэлиибит!
Саха сирин үрдүнэн бүгүн Муусука нэдиэлэтэ саҕаланна.
Татьяна МАРКОВА, «Саха сирэ» хаһыат, edersaas.ru