Чурапчы улууһун баһылыга Андрей Ноговицын ыам ыйын 24 күнүгэр Инстаграмҥа быһа эфиргэ тахсан, улууска коронавирус дьаҥа көстүбүтүнэн сибээстээн ылыллыбыт миэрэлэр туһунан иһитиннэрии оҥордо.
edersaas.ru
Ол курдук, ыалдьыбыт киһини эрдэттэн бу маннык түгэҥҥэ анаан бэлэмнэммит Одьулууннааҕы инфекционнай балыыһаҕа таһааран сытыарбыттар. Бу балыыһа коронавирус ыарыы кэмигэр туттуллар анллаах тэрилинэн толору хааччыллыбытын туһунан эттэ.
Андрей Тимофеевич этэринэн, бу балыыһаҕа барыта 11 киһи үс симиэнэнэн үлэлиир. Мантан ыла кинилэр симиэнэ кэнниттэн дьиэлэригэр барбакка, анал уопсайга олорон үлэлиир буолаллар.
Ыарыһаҕы кытта хантаактаспыта биллибит 11 киһи обсерваторга киирбит. Ол иһигэр кинини кытта биир таксинан кэлбит дьон эмиэ хааччахтаннылар. Кинилэртэн барыларыттан анаалыс ылыллыбыт, ол түмүгүнэн “ыраастара” ыытыллыахтара, сыстыбыттар Одьулуун балыыһатыгар киириэхтэрэ.
Баһылык эбии тоһоҕолоон таксист эппиэтинэһин туһунан эттэ:
— Улуустар икки ардыларыгар сырыы бобуллубутун билэр эрээри дьону тиэйбит суоппар эппиэккэ тардыллыаҕа. Таксистар, бука баһаалыста дьону таһыыны тохтотуҥ! Өскөтүн ыалдьыбыт киһини аҕаллаххытына толору эппиэттигит, бу эппиэтинэс сүрдээх күүстээх, холуобунай дьыалаҕа тиийэ буолуон сөп.
Улуус баһылыга кэлиини-барыыны, ыалга сылдьыыны аччатарга, саастаах дьону диэлэригэр олороллоругар ыҥырда. “Бэйэни хааччахтаныы эрэсиимэ өссө күүһүрүөхтээх, ыарыыны тохтотор гына бары бэйэбитин туттунуоҕуҥ!
Егор Карпов, «Саха сирэ» хаһыат, edersaas.ru