Чурапчылар Уус Маайаҕа, Горнайга, Мэҥэ Хаҥаласка уонна Амурга тиийэн оттуу сылдьаллар
Чурапчы улууһа окко былаана 38 450 туонна этэ да, кураанынан сибээстээн миэстэҕэ 23 682 туонна от хааччыллар туруктаах.
Сааскы ыһыы 590 гектарга ыытыллыбыта, ол иһигэр 503 гектарга элбэх сыллаах от ыһыллыбыта. Итинтэн хаһаайыстыбалар 2200 туонна сиилэһи, 800 туонна сенаһы уонна 1500 туонна оту бэлэмниир соруктаахтар. Ааспыт кыстыктан хаалбыт 960 туонна кур от баар.
Билигин күөх быйыҥ күрэҕэр 1063 тыраахтардаах 780 звено үлэлии-хамсыы сылдьар. Атырдьах ыйын 20 күнүнээҕи туругунан, 17 945 гектар ходуһа сирэ охсулунна, 17 071 тонна от кэбиһилиннэ, ити иһиттэн 1904 туоннаны ыраах участактарынан оттуур мобильнай биригээдэлэр чөкөттүлэр.
Улуус үрдүнэн 43 мобильнай биригээдэ тэриллэн үлэлиириттэн 36 биригээлэ улуус ыраах учаастактарыгар уонна Уус Маайа улууһун сиригэр Нуотараҕа, Горнай, Мэҥэ Хаҥалас улуустарыгар, Амурга тиийэн оттуу сылдьаллар. Кинилэр барыта холбоон 8316 туонна оту бэлэмниир соруктаахтар.
Кэбээйи Сииттэтиттэн 1800 туонна оту атыылаһарга дуогабар түһэрсибиппит эрээри, ойуур баһаара туран, ол аҥаарын эрэ ылар буоллубут, тиийбэт 3000 туонна оту Амур уобалаһыттан атыылаһарга былаанныыбыт диэн улуустааҕы пресс-киинэ иһитинэрэр.
Раиса Сибирякова.