Быйыл Чурапчы улууһугар Ийэ сир сылынан биллэриллибитэ. Сири оҥорууга муниципальнай бүддьүөттэн биэс мөлүйүөн солкуобай көрүллэн, билигин тыа хаһаайыстыбатынан дьарыктанан олорор дьон дулҕалаах, талахтаах сирдэрин оҥорон саҕалаатылар.
Былаан быһыытынан, быйыл тоҕус нэһилиэккэ, Одьулууҥҥа, Мырылаҕа, Мындаҕаайыга, Хайахсыкка, Чакырга, Төлөйгө, Мугудайга, Дириҥҥэ уонна Хатылыга, дулҕа, талах саба үүммүт сирдэрин астаран, сирдэри кэҥэтии барыахтаах. Чурапчы улууһун агронома Марианна Пермякова иһитиннэрбитинэн, улуус үрдүнэн 389 га сир оҥоһуллуохтаах.
— Бастатан туран, быйыл улууспут бүддьүөтүттэн биэс мөлүйүөн солкуобай дулҕаны астарыыга көрүллэн, элбэх киһи сирин оҥостор кыахтанна диэн этиэхпин баҕарабын. Бу харчынан туһанан, хаһаайыстыбалар дулҕаны астарыыга көрсүбүт ороскуоттарын 60 % төттөрү ылыахтара. Ити олус улахан көмө. Маны таһынан быйыл федеральнай бырагыраамаҕа киирсэн, өссө үс хаһаайыстыба эмиэ сири оҥорууга ылсыаҕа. Былырыын Кытаанахха бу бырагырааманан тэрээһиннээх хаһаайыстыбалаах Трофим Борисов 25 гектар сири оҥостубута. Билиҥҥи туругунан, улуус үрдүнэн 75 гектар сир оҥоһулунна. Бу ыйга өссө 142 гектар астарыахтара. Онтон хаалбытын атырдьах ыйыгар диэри оҥоруохтара. Икки улахан хаһаайыстыбабыт “Комплекс” уонна “Мындаҕаайы” мульчер диэн дулҕаны, талаҕы барытын илдьиритэн кэбиһэр анал оборудованиены сакаастаатылар. Бу сүөһү аһылыгын бэлэмнээһин бырагырааматынан Перьм куораттан кэлиэхтээх, — диэн бэлиэтиир кини.
Чурапчы улууһугар барыта 323 бааһынай хаһаайыстыба, 13 кээпэрэтиип, 1800 тус хаһаайыстыбалар бааллар. Былырыын тыа хаһаайыстыбатын валовай бородууксуйаларын оҥорон таһаарыы 1,6 млрд солкуобайга тэҥнэспит.
Аграфена КУЗЬМИНА