Биһиги санаабытыгар, Арассыыйа сөптөөх хардыыны оҥорон, араас өйдөөх-санаалаах, устуоруйаны токурутар дьоҥҥо биһиги ини-бии, модун Арассыыйа буоларбытын, 21-с үйэҕэ, эйэлээх олоххо дьон атаҕастабыла суох буолуохтаах диэн анал эпэрээссийэ ыытыытын өйүүбүт диэн Чурапчы улууһун баһылыга Степан Саргыдаев этэр.
— Биһиги бу санкцияларга бэйэбит улууспут иһинэн сөптөөх дьаһаллары ыла олоробут: стратегическай бородуукталарга сыана үрдээбэтин, дьону килиэбинэн хааччыйыы боппуруостарыгар, кыра уонна орто урбаанньыттарбытыгар көмө быһыытынан ыытыы уонна Чурапчы улууһун 100 сыллаах үбүлүөйбүтүгэр дьиэ кэргэн экэниэмикэтин бөҕөргөтүүгэ… Дьиэ кэргэн дохуотун хааччыйыыга уонна аһылыктарын булуналларыгар сиэмэтин көрөн, сирин быһан 2 гектардаах сиргэ хортуоппуй ыһыахпыт. Уу кутуутун улахан тэрилтэни кытта кэпсэтэн олоробут, дьиэ кэргэн оҕолорун кытта сайын устата бэйэлэрэ көрөн-истэн, күһүн хостоон кыстыыр аһылыктарын хаһааныахтара диэн дьиэ кэргэн экэниэмикэтигэр биир улахан хардыыны оҥордубут.
Ону таһынан, түргэнник ситэр салааҕа, куурусса, сибиинньэ оҕото, кус-хаас иитиитигэр, миэстэтигэр тиэрдиигэ көмө харчыны көрөн чэпчэтиилээх атыылары оҥоруохпут. Дьоммут-сэргэбит сайынын астарын булуналларыгар, кэтэх хаһаайыстыбалары тэринэллэригэр ити курдук дьаһаллары ыллыбыт, биир улахан болҕомтону тыа хааһыйыстыбатын боппуруостарыгар уурдубут.
Быйыл Ил Дархан Айсен Сергеевич Николаев өрөспүүбүлүкэҕэ Ийэ сылын биллэрбитэ, улууспутугар Ийэ сир сыла анаммыта. Ийэ сылыгар эмиэ сөптөөх дьаһалы ылан, бастакытын ийэ аатын сүкпүт дьиэ кэргэн хаһаайкаларыгар 50 тыһ. солк. көмөнү оҥоробут, — диэн баһылык бэлиэтээтэ.
Людмила ПОПОВА, “Саха сирэ” хаһыат, edersaas.ru
Хаартыска: СИА.