Чурапчылар Москваҕа «далаһа» уурдулар

Ааптар: 
Бөлөххө киир:

2023 сылга Чурапчы улууһа судаарыстыбаннай диэйэтэл Иван Винокуров төрөөбүтэ 130 үбүлүөйдээх сылын бэлиэтиэҕэ.

Саха сирин бастайааннай бэрэстэбиитэлистибэтигэр Иван Николаевич 1925-1928 уонна 1933-1934 сылларга салайааччынан үлэлээбитэ уонна федеральнай кииҥҥэ Саха сирин интэриэһин сирэйдээбитэ. Онон сибээстээн улуус салалтата  бу тэрээһиҥҥэ эрдэттэн бэлэми саҕалаата.

Ол курдук, олунньу 8 күнүгэр Саха сирин Постпредствотын салайааччыта  Андрей Федотов, Чурапчы улууһун  баһылыгын бастакы солбуйааччы Алексей Егоров уонна Арыылаах нэһилиэгин баһылыга  Алексей Лобанов куйаар ситимин нөҥүө буолбут көрсүһүүгэ ыытыллыахтаах үлэни дьүүллэстилэр, ырыттылар, сүбэлэстилэр.  Бу туһунан Саха сирин бастайааннай бэрэстэбиитэлистибэтин саайтыгар иһитиннэрдилэр.

Барыллаан былааннааһыҥҥа Чурапчы улууһун олохтоохторо сыстыганнаах дьаҥ кэнниттэн “Бэс Чагдаҕа” доруобуйаларын бөҕөргөтүннэллэригэр, бу санаторийга Чурапчытааҕы спортивнай институн устудьуоннарын Арассыыйа кииннэммит күрэхтэһиилэригэр кыттыыларыгар бэлэмнэнэр кэмнэригэр сынньалаҥнарын тэрийиигэ, Москваҕа олорор Чурапчыттан төрүттээх устудьуоннар уонна онно олорон үлэлиир дьону кытта холбоһуктаах тэрээһиннэри ыытыы туһунан боппуруостары көрдүлэр. Докумуону ситэрэн, үөрэтэн баран, өрүттэр кулун тутарга анал Сөбүлэҥҥэ  үөрүүлээх быһыыга-майгыга илии баттаһыахтара.

Саха сирин Постпредствотын салайааччыта  Андрей Федотов Чурапчы улууһун салалтата бастакынан маннык үлэни тэрийиитэ өрөспүүбүлүкэ атын улуустарын салайааччыларыгар бастыҥ холобур буоларын бэлиэтээн туран, бииргэ үлэлээһиҥҥэ бэлэмин бэлиэтээтэ.

Елена ПОТОЦКАЯ, “Саха сирэ” хаһыат, edersaas.ru

Хаартыска — Постпредство саайтыттан.

+1
0
+1
0
+1
1
+1
0
+1
0
+1
0
+1
0