Күөх Маайы Чурапчы нэһилиэгин олохтоохторо уратытык көрүстүлэр.
Бу туһунан «Чурапчы нэһилиэгэ» МТ баһылыга Степан Саргыдаев кэпсиир:
— Араас архыыпка хасыһан, 2018 сылга Чурапчы нэһилиэгэ 370 сылын туоларын билбиппит. Ол курдук, Санкт-Петербург куоратын, Наука академиятын Саха сиринээҕи салаатын, СӨ Национальнай архыыптарын кытта үлэлэһэн, Чурапчы нэһилиэгин бастакы аата «3-с Хатылы» диэн буоларын чуолкайдаабыппыт. Өчөй Табутаев диэн киһи алта уоллаах эбит. Онтон иккис уола Ньамньах Аччаҕар 1648 с. кинээс быһыытынан сүрэхтээбит 3-c Хатылы нэһилиэгэ нэһилиэнньэлээх пуун быһыытынан сурукка-бичиккэ киирбит.
Нэһилиэк салалтата дьокутааттарбытын, дьоммутун-сэргэбитин кытта сүбэлэһэн баран, бу улахан суолталаах бэлиэ даатаҕа 370 үтүө дьыаланы оҥорорго сүбэлэспиппит. Кулун тутар бүтэһигэр олохтоох дьаһалта үлэһиттэрэ улуус киинин пааматынньыктарыттан хаардарын түһэрбиппит, тротуардары ыраастаабыппыт уонна биир дойдулаахтарбытыгар нэһилиэкпит 370 сылыгар ким туох кыахтааҕынан үтүө дьыаланы оҥоруоҕуҥ диэн ыҥырыы таһаарбыппыт. Тэрилтэлэр идэлээх сойуустарын салайааччыларын кытта көрсөн, 1 Маай бырааһынньыгын үлэни кытта ситимнээн бэлиэтииргэ сүбэлэспиппит. Нэһилиэкпитигэр бөдөҥ тэрилтэлэргэ кыралары холбоон (барыта 80 тэрилтэ), 14 холбоһуктаах хамаанда оҥорон, кэлим күрэхтэһиилэри ыытабыт. Онно субуотунньуктан саҕалаан, култуурунай- спортивнай күрэхтэһиигэ тиийэ араас хайысха барыта киирэр. Күөх Маайдааҕы сэлэлээн хаамыыга ким баҕалааҕы буолбакка, ол 14 холбоһуктаах хамаандаларга 24-түү киһилээх колонналары оҥорбуппут. Бу дьон бары үлэлиир тэриллээх кэлэн, сэлэлээн хаамыыга кыттыбыттара.
Сэлэлээн хаамыы миитинин кэнниттэн хас биирдии бөлөх бэйэтигэр сүктэриллибит хайысхатынан үлэлээн барбыта.
Уопсайа 8 тиэхиньикэ үлэлээтэ. Түгэнинэн туһанан, «Хатан» (сал. Владимир Сивцев), «Дорожник» (сал. Гаврил Владимиров), «Чурапчы-автодор» (сал. Симон Петров) хааччахтаммыт эппиэтинэстээх тэрилтэлэргэ махталбытын тиэрдэбин.
Аҕыйах чаас иһигэр 2 тыһ. курдук киһи кыттан, тапталлаах Чурапчыбытын ып-ыраас оҥорон кэбистибит. Ол курдук, улахан кыамталаах тиэхиньикэлэр тэрилтэлэр хаарбах дьиэлэрин көтүрэн ыраастаатылар, суолу оҥорооччулар, нэһилиэкпит суолун көннөрдүлэр. Көтүрүллүбүт дьиэлэр буордарын уу күүскэ охсубут сирдэригэр кутан толордубут.
Күргүөм үлэ кэнниттэн оҕо саадын идэлээх сойуустарын чилиэннэрэ тэрийбит «Полевой куукуналарыгар» үлэ дьонун эбиэттэттибит. Ол кэнниттэн киин болуоссакка нэһилиэкпит 370 сылынан чэпчэки атлетика эстафетатын ыыттыбыт. Онно 1-кы миэстэни Дмитрий Коркин аатынан Чурапчытааҕы интернат-оскуола, 2 -с миэстэни — физкультура института, 3-с миэстэни холбоһуктаах баһаарынай тэрилтэ хамаандата ыллылар. Ити курдук, Чурапчы нэһилиэгин дьоно Үлэ бырааһынньыгын бэрт тэрээһинннээхтик ыыттыбыт.
Дьэ, кырдьык, чурапчылар Үтүө дьулуур сылыгар сөп түбэһиннэрэн төрөөбүт нэһилиэктэрин үбүлүөйүгэр бэртээхэй тэрээһини оҥордулар, өрөспүүбүлүкэҕэ Үлэ бырааһынньыгын кэпсээҥҥэ сылдьар гына тэрийдилэр.
Елена ПОТОЦКАЯ, «Саха сирэ» хаһыат, edersaas.ru
Хаартыска: батсааптан