Чурапчылар аҕам саастаахтарыгар босхо бородууктаны түҥэтэллэр

Чурапчы улууһугар «Дьиэ кэргэн экэниэмикэтэ» бырайыак чэрчитинэн аҕам саастаахтарга көмөлөһөн, босхо бородуукталары түҥэтэллэр.

«Босхо бородуукта нобуорун 17 нэһилиэктэн барыта 250 киһи ылыаҕа. Бу барыта 80 сааһын ааспыт дьон. Нобуор иһигэр саахар, куруппа, мокоруон, мас арыыта, чээй уонна бурдук ас баар», — диэн Чурапчы улууһун дьаһалтатын дьиэ кэргэҥҥэ исписэлииһэ Татьяна Бушкова иһитиннэрэр.

Аахсыйаҕа анаан улуус бүддьүөтүттэн харчы көрүллүбүт. Улууска «Дьиэ кэргэн экэниэмикэтэ» бырайыак дьон билиниитин ылыан ылла. Бу бырайыак көмөтүнэн хаһаайыстыбалар сүөһү эбии аһылыгын ыллылар, элбэх оҕолоох ыаллар, аҕам саастаахтар өйөбүлү биллилэр.

Үтүө көҕүлээһини Ил Дархан Айсен Николаев Чурапчыга оробуочай сырыытын кэмигэр хайҕаабыта.

Чурапчы улууһун дьаһалтатын пресс-сулууспата.

Хаартыскалар — пресс-сулууспаттан.