«Күүстээх көлө-2017» күрэхтэһии Чурапчы сэлиэнньэтигэр буола турар. Барыта 33 тыраахтар куоталаһар.
Прокопий БУБЯКИН, «Саха сирэ» хаһыат https://edersaas.ru
Амма, Мэҥэ Хаҥалас, Таатта уонна Чурапчы улуустарыттан 44 экипаж кытта сылдьар. «Муостаах» МТЗ-82 («Беларусь») тыраахтырдар кытталлар. Түөрт түһүмэххэ киирсэллэр. Тыраахтары киэргэтиини, тырахтарыыс экипировкатын тэрийээччилэр эмиэ болҕомтолоохтук көрөллөр.
Түһүмэхтэр:
1. Суол быраабыларын билии
2. Бырысыабы араарыы, холбооһун
3. «Муоһунан» бэрэбинэни көтөҕөн икки чуукка үрдүгэр ууруу
4. Тоҥуу хаарынан сүүрдүү (400 м).
Бастакы үс түһүмэххэ бириэмэни уонна хаачыстыбаны учуоттуохтара. Саамай күүтүүлээх уонна көстүүлээх төрдүс түһүмэх буолуоҕа. Манна икки түһүмэҕинэн куоталаһыахтара. Маҥнай биэстии тыраахтар бөлөҕүнэн сүүрдүөхтэрэ. Бөлөх аайы бастаабыттар аны иккис түһүмэххэ — финальнай сүүрдүүгэ тахсыахтара… Дьэ, онон, Чурапчы сэлиэнньэтин бүгүн Күрүө Тумус алааһыгар элбэх сэлээркэ үрдэриллэр, хаһыы-ыһыы дуораһыйар. Дьиҥнээх эр дьон бырааһынньыга!
Билиҥҥитэ, биир даҕаны тыраахтар алдьанан туораабытын туһунан информация киирэ илик.
Кыттааччы санаата
Аргунов Петр Петрович , «Күүстээх көлө-2017» күрэхтэһиигэ Таатта улууһун бэрэстэбиитэлэ төлөпүөнүнэн кэпсээтэ:
— Улууспуттан 5 тырахтарыыһы кытыннара аҕаллым. Дэбдиргэттэн үс, Туора Күөлтэн биир уонна Ытык Күөлтэн биир «МТЗ-82» трактор кэллэ. Билигин бу киирсэ аҕай сылдьабыт. Кыайар санаалаахпыт!
Бириистэр
Сүрүн бириистэр:
Бастакы миэстэҕэ — квадроцикл
Иккис миэстэҕэ — “Чезет” карабин саа
Үһүскэ “МТЗ-82” тыраахтар кэлин көлүөһэтин кэмпилиэгэ
Тэрийээччилэр
Сүрүн тэрийээччилэр: Чурапчы улууһун «Эркин” эр дьон түмсүүтэ уонна “Аҕалар Лигалара” өрөспүүбүлүкэ аҕаларын түмсүүтэ.
Устууну батсааптан ыллыбыт:
Прокопий БУБЯКИН, «Саха сирэ» хаһыат https://edersaas.ru