«Тыл — омук тыына» пуорум Чурапчы улууһугар онлайн-эрэсииминэн ыытыллыа.
Улууска Төрөөбүт тыл уонна сурук-бичик күнүгэр аналлаах дэкээдэҕэ бэлэмнэнии үлэ бара турар. Олунньу 11 күнүттэн саҕалаан олунньу 21 күнүгэр диэри тэрээһиннэр салҕаналлар. Пуорум сүрүн чааһа олунньу 17 күнүгэр былааннанар диэн улуус дьаһалтатын пресс-сулууспата иһитиннэрэр.
«Тыл — омук тыына» пуоруму биһиги саха тылын, литэрэтиирэтин харыстыыр уонна киэҥник тарҕатар соруктаах тэрийэбит. Былырыын тэрээһиҥҥэ тоҕус улуустан уопсайа 430 киһи кыттыыны ылбыта. Өрөспүүбүлүкэҕэ санитарнай-эпидемиологическай быһыыны-майгыны учуоттаан, бары тэрээһиннэр онлайн-эрэсииминэн ыытыллыахтара«, — диэн Чурапчы улууһун баһылыга Андрей Ноговицын быһаарар.
Быйыл Болтоҥоҕо история, литэрэтиирэ комплекса тутуллара былааннанар. Болтоҥоҕо биллиилээх лингвист, учуонай, саха суругун-бичигин, алпаабытын төрүттээччи, бөдөҥ уопсастыбаннай диэйэтэл, талааннаах педагог С.А.Новгородов, бэйиэт С.А.Саввин-Күн Дьирибинэ, суруйааччы, тылбаасчыт, Аҕа дойду уоттаах сэриитин кыттыылааҕа Г.И.Макаров-Дьуон Дьаҥылы, суруйааччы, бэйиэт, тылбаасчыт Василий Яковлев, артыыс В.А.Саввин, норуодунай суруйааччылар Болот Боотур, Сэмэн Тумат уо.д.а. төрөөбүттэрэ, олорбуттара.
Дэкээдэ «Төрөөбүт тыл — саха омук саргыта» диэн квест-оонньуунан саҕаланар. Салгыы С.А.Новгородов аатынан Чурапчы орто оскуолатын онлайн-былаһааккатыттан үөрэнээччилэр «Төрөөбүт соругум» диэн хоһоонунан челленджкэ кытталлар. Маны сэргэ, оскуола үөрэнээччилэрэ төрөөбүт тыл туһунан хоһоону кэлэктиибинэн ааҕыы улуустааҕы күөн күрэһигэр илин-кэлин түсүһүөхтэрэ. Сахалыы уонна англия тылынан «Аман өс» араатардар өрөспүүбүлүкэ таһымнаах күөн күрэстэрэ ыраахтан (дистанионнай көрүҥүнэн) ыытыллара былааннанар. Оскуолаҕа киириэн иннинээҕи саастаах уолаттар «Тыл хоһуун» күөн күрэскэ холонуохтара. Ону таһынан, 6,7,8,10 кылаастар үөрэнээччилэригэр улуустааҕы дистанионнай күрэхтэһии ыытыллар.
Төрөөбүт тыл уонна сурук-бичик күнүнэн дэкээдэ, бары тэрээһиннэр онлайн-эрэсииминэн ыытыллаллар уонна социальнай ситимнэринэн, ZOOM уонна Чурапчы улууһун маассабай иһитиннэрэр-биллэрэр сириэстибэлэринэн сырдатыллаллар.
Хаартыска архыыптан
+1
+1
+1
+1
+1
+1
+1