Чурапчы улууһугар Таатта күннэрэ буола турар. Таатта уонна Чурапчы улуустара ыаллыы олорор буоламмыт былыр былыргыттан доҕордоһон, үөрүүнү-хомолтону тэҥҥэ үллэстэн кэллибит.
edersaas.ru
Икки улуус доҕордоһуута сыллата кэҥээн, киэҥ далааһыннанан иһэр. Тулхадыйбат доҕордоһуу олох бары эйгэтин хабан уопут атастаһыы, улуустар күннэрин сыллата ыытыы быһыытынан барар. Ол үлэҕэ-хамнаска , бэйэ бэйэҕэ сыһыаҥҥа үчүгэй эҥэрдээх, үчүгэй түмүктээх буолара саарбаҕа суох.
Бүгүҥҥү тэрээһиҥҥэ 12 бырайыагынан киэҥ ис хоһоонноох быыстапка тэрийэн ыыттыбыт. Таатта улууһун бастыҥ үлэлээх агрооскуолалара бэйэлэрэ онорон таһаарбыт бородууксуйаларынан атыы- тутуу тэрийдилэр. Үлэ араас салааларынан тыа хаһаайыстыбатын, доруобуйа харыстабылын, үөрэхтээһин, спорт тэрилтэлэрэ хардарыта уопут атастастылар, социальнай тутууларынан сырыттылар. «Биир санаанан — ситимнээх үлэҕэ» диэн төгүрүк остуолга икки улуус баһылыктара, муниципальнай тэриллиилэр баһылыктара, тэрилтэ салайааччылара кыттыыны ыллылар.
Инникитин да саҥа соруктары бииргэ олоххо киллэриэхпит, туруоруммут сыалбытыгар бииргэ дьулуһуохпут. Биһиги икки улууспут доҕордоһуутун, бииргэ сомоҕолоһуутун өссө сайыннарыахпыт, тапталлаах Сахабыт сирэ чэчириирин туһугар үлэлиэхпит-хамсыахпыт!
Анна Яковлева, edersaas.ru сайтка анаан.