Чурапчы улууһугар сыл бастыҥ үөрэнээччилэрин, спортсменнарын, уопсастыбанньыктарын эҕэрдэлээтилэр.
«Улуус баһылыгын Ороһуоспатааҕы харыйата-2020» үөрүүлээх тэрээһин куйаар ситиминэн ыытылынна.
—Биһиги оройуон сайдыытыгар бэйэлэрин кылааттарын киллэрсибит, сыл бастыҥ үөрэнээччилэрин, өрөспүүбүлүкэтээҕи, Бүтүн Арассыыйатааҕы, норуоттар икки ардыларынааҕы олимпиадалар, куонкурустар, научнай-практическай кэмпириэнсийэлэр, спортивнай күрэхтэһиилэр кыайыылаахтарын эҕэрдэлээтибит. Кинилэр дьүккүөрдээх үлэлэринэн, кыһамньыларынан үтүө түмүктэри ситиспиттэрэ уонна оскуолаларыгар, улуустарыгар ситиһиини аҕалбыттара биһигини улаханнык үөрдэр. Биһиги кинилэринэн киэн туттабыт, — диэтэ улуус баһылыга Андрей Ноговицын.
«Бастыҥ үөрэнээччи-2020» анал ааты Оконешникова Анастасия, Копылова Мария, Березкина Дайаана, Павлуцкая Яна, Иванова Леванна, Кривошапкина Алина, Иннокентьева Ангелина, Кузьмина Айна, Филиппова Анжела, Корякин Василий ыллылар. «Бастыҥ спортсмен-2020» номинация кыайыылаахтарынан Федоров Вадим, Кардашевская Алина, Драгунов Алексей, Бояновскай Владимир, Федоров Ян, Аржаков Михаил, Кривошапкин Изот, Дьячковскай Айаал, Иванов Валентин, Петров Николай буоллулар. «Сыл бастыҥ уопсастыбанньыга-2020» анал аат Гермогенова Алинаҕа, Дьячковскай Владимирга, Олесов Яковка, Пермяков Ньургуҥҥа, Николаев Кэнчээригэ, Пестерев Спиридоҥҥа, Сокольникова Вероникаҕа, Собакин Ньургуҥҥа, Ноговицын Семеҥҥа, Аржакова Аннаҕа туттарылынна.
В.С.Соловьев-Болот Боотур аатынан Хатылы орто оскуолатын үөрэнээччитэ Кэнчээри Николаев харда тылын тиэртэ, махтанна. Тэрээһиҥҥэ улуус мунньаҕын дьокутааттарын бэрэссэдээтэлэ Афанасий Захаров, социальнай боппуруостарга баһылыгы солбуйааччы Николай Аммосов, СӨ ыччат дьыалаларыгар уонна социальнай коммуникацияҕа миниистир Степан Саргыдаев, улуустааҕы үөрэх управлениетын начаалынньыга Юрий Посельскай, үөрэнээччилэр уо.д.а. кытыннылар.
Чурапчы улууһун дьаһалтатын пресс-сулууспата