Чурапчы улууһун олохтоохторо быыбарга, үгэс быһыытынан, көхтөөхтүк кытталлар. Быйыл эмиэ, сарсыарда эрдэттэн, улуус киинигэр, нэһилиэктэргэ, кэлии-барыы элбээтэ, сырыы-айан үксээтэ.
Күнүс 12 чаастааҕы туругунан, Чурапчы улууһун быыбардааччытын 36, 55 бырыһыана хайыы-үйэҕэ куоластаата. Көҕү-нэми тэрээһин үчүгэйэ эмиэ хааччыйар.
Холобур, улуус киинигэр Чурапчыга (баһылык С.А.Саргыдаев) уонна да атын бары нэһилиэктэргэ ТОС-тар (территориальные общественные управления) тэрийиилэринэн, хас биирдии быыбардыыр учаастакка кэлбит дьону тэрээһин эгэлгэтэ күүтэр. Маны таһынан мустубут дьону босхо итии чэйинэн, сылаас блинынан, шашлыгынан, о.д.а. минньигэс ас арааһынан күндүлүүллэр.
Үгүс киһи болҕомтотун оскуолалар тэрийбит «Мин оскуолам» эбии үөрэхтээһин 100 сылыгар аналлаах бырайыактара ылар. Эһиги бу хаартыскаҕа Чурапчытааҕы “Кэскил” уһуйаан педагога Николай Семенович Дьячковскайы көрөҕүт, кини бүгүн 1N-дээх орто оскуолаҕа маастар-кылаас ыытта.
Бу бырайыакка нэһилиэктэр оскуолалара бары көхтөөхтүк кытталлар.
Холобур, Болтоҥо оскуолата уонна “Кэнчээри” уһуйаан “Болтоҥо аатырбыт дьонун төһө билэҕин?” диэн брейн-ринг кэрэхсэбиллээх оонньууну ыыттылар. Чакырдар “Мин дьиэ кэргэним идэтэ” куонкуруһу, Үрэх-Күөрэ, Түөйэ оскуола-саадтара араас быыстапкалары тэрийдилэр. Хахыйахтар референдум, Мындаҕаайыга Амма орто оскуолата уонна «Ымыы» уһуйаан «Мы—за будущее!» бэртээхэй оонньууну ыыттылар.
Биир тылынан эттэхэ, Чурапчы улууһугар Быыбар күнүгэр бырааһынньыктыы сэргэх уонна интэриэһинэй буолла.
Татьяна МАРКОВА,«Саха сирэ» хаһыат, edersaas.ru