Быйыл сайын курааннаан, аһыҥа туран, Чурапчы улууһугар от үүнүүтэ мөлтөх.
edersaas.ru
Оттооһуҥҥа быйылгы соруктар тустарынан тыа хаһаайыстыбатын улуустааҕы управлениетын кылаабынай агронома Марианна Пермякова маннык билиһиннэрэр:
– Быйыл улууска 20 тыһ. ынах сүөһүнү, ол иһигэр 7400 ыанар ынаҕы, 16249 сылгыны кыстатарбытыгар 38 450 т окко суоттанабыт. Кураантан, аһыҥаттан өрүсүһэн, биирдиилээн хаһаайыстыбалар ходуһаҕа эрдэ киирбиттэрэ, оттон маассабай оттооһун Бөтүрүөп таҥара кэнниттэн, от үүнүүтэ сиппитин кэннэ, саҕаланна. Барыта 2963 гектар бааһына сирэ охсуллан, 1 020 т от бэлэмнэннэ.
Тыа хаһаайыстыбатын управлениетын исписэлиистэрэ нэһилиэктэр дьаһалталарын кытары кэрийэн көрүүбүт түмүгүнэн, миэстэҕэ 26 282 т, ол эбэтэр кыстыыр оппут 73 %-ын эрэ хааччынар кыахтаахпыт быһаарылынна. Манна ааспыт кыстыктан ордубут 960 туонна кур оппутун эптэхпитинэ, уонча туонна от тиийбэт. Ону булунарга мобильнай биригээдэлэри тэрийэн өрүс арыыларыгар, ыраах учаастактарга сир булан ыытан оттотуохпут. Өссө бэс ыйын бүтүүтүттэн саҕалаан, Уус Маайаҕа, Нуотара учаастагар, Горнай уонна Ньурба улуустарыгар оттуу барарга итиэннэ Кэбээйиттэн от атыылаһар туһунан кэпсэтиилэри ыытан, илии баттаһан, дуогабар түһэрсэн олоробут. Мобильнай биригээдэлэр 3 220 туоннаны оттуур соруктаахтар. Ону таһынан, 3 120 туоннаны атыылаһарга дуогабардастыбыт, ол иһигэр Кэбээйиттэн 1,8 тыһ. , Ньурбаттан 300, Хаҥаластан 500, Хатастан 50 туоннаны атыылаһыахпыт. Билигин 4 тыһыынча туоннаны атын улуустартан булар туһунан кэпсэтиһэ сылдьабыт. Хаҥалас улууһун, Тулагы арыыларыгар уонна аукциоҥҥа тахсыбыт куорат аннынааҕы арыыларга эрэнэбит. Саас ыһыыны 1590 гектарга, ол иһиттэн 503 гектар бааһынаҕа элбэх сыллаах оту ыспыппыт, онтон 2 200 т сиилэһи, 800 т сенаһы ыларга итиэннэ 1500 т оту бэлэмнииргэ суоттанабыт. Барыта 21 мобильнай биригээдэ тэрилиннэ, Бахсы, Болтоҥо, Чакыр биригээдэлэрэ оттуур сирдэригэр бардылар.
Чурапчыттан Алексей Слепцов, «Саха сирэ» хаһыат, edersaas.ru саайтка анаан.