Уопсастыба

Чурапчыга онкоскрининг кэбиниэтэ арылынна

П.Н.Сокольников аатынан Чурапчы улууһун киин балыыһатыгар онкоскрининг кэбиниэтин астылар. Бу туһунан улуус дьаһалтатын пресс-сулууспата иһитиннэрдэ. 

Врач-онколог Андрей Захаров искэн ыарыытын эрдэ билэр туһуттан маннык кэбиниэт арыллыбытын этэр.
«Бастаан киһи уопсай туругун быһаарарга биэссэр анкетирование оҥорор. Ол кэнниттэн уоһун, кулгааҕын, күөмэйин, сирэйин, түөһүн, тириитин көрөн баран, анаалыстарга ыытар. УЗИ-га уонна ФГДС -ка да ыытыан сөп. Анаалыстар уонна чинчийэн көрүүлэр кэннилэриттэн туох эмэ уларыйыы баар буоллаҕына, пациент быраас-онколокка көрдөрө кэлэр. Салгыы быраас өссө ымпыктаан-чымпыктаан сиһилии көрөр уонна Дьокуускайга искэн ыарыылаахтары эмтиир диспансерга направление биэрэр«, — диэн кэпсээтэ.
Кини онкоскрининг кэбиниэтигэр оҥоһуллар өҥөлөрүнэн улуус бары олохтоохторо босхо туһаналлар диэтэ. Искэн ыарыытын эрдэ быһаарыы түргэнник эмтээн үтүөрдэргэ, искэни суох оҥорон кэбиһэргэ, ыарыы салгыы тарҕаммакка бохсулларыгар көмөлөһөрүн бэлиэтээтэ.
0
0
Telegram @edersaas20

Добавить комментарий