Чурапчыга Олоҥхо күнүгэр норуот маастардара сэлэлээн хаамтылар
Бүгүн Олоҥхо күнүн чэрчитинэн Чурапчыга «Ай» норуот маастардарын түмэр устуудьуйа 50 сыллаах үбүлүөйүн бэлиэтээн, норуот маастардара кыһыҥҥы саха национальнай көстүүмнэрин кэтэн, сэлээлээн хаамтылар.
edersaas.ru
Бу туһунан сиһилии «Ай» устуудьуйа сүрүннүүр исписэлииһэ Саина Гоголева бу курдук кэпсээтэ:
— Валентина Пинигина салайар «Ай» норуот талааннаахтарын түмэр устуудьуйа 50 сыллаах үбүлүөйүн икки күннээх тэрээһинигэр Илин эҥэр улуустарыттан Улуу Кудаҥса сыдьааннара, тимир уустара уонна иистэнньэҥнэр, кыттыыны ыллылар. Уопсайа 70-ча киһи (30-ча тимир ууһа, 40-ча иистэнньэҥ) көхтөөхтүк кэлэн үлэлэрин быыстапкатын тэрийдилэр, сэлэлээн хааман, Чурапчы дьонун сэргэхситтилэр.
50 сыл устата «Ай» норуот талааннаахтарын түмэр устуудьуйа нөҥүө төһөлөөх айар куттаах дьон бэйэлэрин кыахтарын уһугуннарбыттара буолуой?
Саина Гоголева бэлиэтииринэн, 1989 сылтан 80-тан тахса айар талааннаах дьон «Чурапчы улууһунааҕы норуот маастара», «Уус-уран оҥоһук маастара», «СӨ норуотун маастара» курдук улуус уонна өрөспүүбүлүкэ таһымнаах бочуоттаах бэлиэлэргэ тиксибиттэр.
Олоҥхо күнүн чэрчитинэн тэриллибит Чурапчытааҕы «Ай» устуудьуйа үбүлүөйүн тэрийээччилэр ыаллыы сытар оройуоннар маастардарын ыҥыран, бу суолталаах тэрээһини өрөспүүбүлүкэтээҕи таһымнаатылар.
Елена ПОТОЦКАЯ, «Саха сирэ» хаһыат, «edersaas.ru