Чурапчыга олимпиецтарга анаан искибиэр тутуллар

Ааптар: 
Бөлөххө киир:

Чурапчы улууһугар Саха АССР, РСФСР, ССРС үтүөлээх тириэньэрэ Дмитрий Петрович Коркин төрөөбүтэ 95 сылыгар аналлаах үбүлүөйдээх тэрээһиҥҥэ бэлэмнэнии үлэтэ саҕаланна. Тэрийэр хамыыһыйаны СӨ бырабыыталыстыбатын бэрэссэдээтэлэ Андрей Тарасенко уонна оройуон баһылыга Степан Саргыдаев салайаллар. Бу туһунан Чурапчы улууһун дьаһалтатын пресс-сулууспата иһитиннэрэр.

Үбүлүөйдээх даатаҕа анаан спортивнай оскуола сиригэр «Олимпиецтар искибиэрдэрэ» уонна Чурапчы сэлиэнньэтигэр киириигэ «Устуоруйа аллеята» оҥоһуллаллар, итиэннэ «Спортивнай» диэн микро-түөлбэҕэ үлэ ыытыллар. Тэрийэр хамыыһыйа мунньаҕар «Спортивнай» түөлбэҕэ гаас ситимин тардыыны, суолу аспааллааһыны, успуорт мусуойун судаарыстыбаннай мусуойдар реестрдэригэр киллэриини өрөспүүбүлүкэтээҕи тэрээһиннэр былааннарыгар киллэрэр туһунан кэпсэттилэр.

2023 сылга Чурапчыга сүүмэрдэммит хамаандалар күрэхтэһиилэрэ былааннанар. Чурапчытааҕы физкултуура уонна успуорт институтун ректора Иннокентий Готовцев спортивнай тустуу тула научнай-чинчийэр кэмпириэнсийэни тэрийэр туһунан этиини көтөхтө.

Андрей Тарасенко тэрийэр хамыыһыйа этиитин кытта сөбүлэстэ уонна өрөспүүбүлүкэ успуорка министиэристибэтигэр уон күн иһигэр былааны оҥорон киллэрэригэр соруйда.

+1
0
+1
0
+1
0
+1
0
+1
0
+1
0
+1
0