Чурапчыга Николай Кривошапкин — Уот Субуруускайга пааматынньык туруордулар

Ааптар: 
Бөлөххө киир:

Чурапчы сэлиэнньэтигэр саха милииссийэтин 100 сылыгар анаан, бу улууска милииссийэни аан бастакынан тэрийсибит Николай Дмитриевич Кривошапкин — Уот Субуруускайга кэриэстэбил бэлиэтигэр, пааматынньык туруордулар. Дьоһуннаах тэрээһин от ыйын 10 күнүгэр буолла.

edersaas.ru

Пааматынньыгы, милииссийэ бэтэрээннэрин көҕүлээһиннэринэн, саҥа тутуллубут Ис дьыала отделын иннигэр туруордулар. Ааптар — олохтоох скульптор Григорий Турантаев.

Пааматынньыгы үөрүүлээхтик аһыы долгутуулаах түгэнигэр улуус дьаһалтатын салалтата, Ис дьыала отделын личнэй састааба, Субуруускай сиэнэ Виктор Субуруускай уонна чугас аймах-билэ дьоно кытыннылар.

Сиэн уол — олоххо куттал үөскээтэҕинэ илиинэн киирсиигэ («рукопашнай бой») инструктор, кини быраабы араҥаччылыыр уорганнары бу көрүҥҥэ дьарыктыыр, кыраныысса таһыгар дойду чиэһин элбэхтик көмүскээбит идэтийбит «рукопашник».

Уот Субуруускай туһунан толору ис хоһоонноох дакылааты Чурапчы улууһун Ис дьыалаҕа отделын начаалынньыга, полиция подполковнига Иннокентий Свинобоев оҥордо уонна бу үлэҕэ көхтөөхтүк кыттыбыт бэтэрээннэргэ наҕараада туттартаата.

Чурапчы улууһун баһылыга Андрей Ноговицын урукку сылларга үтүө суобастаахтык сулууспалаабыт астаапкаҕа сылдьар милииссийэ полковнига Геннадий Алексеевка уонна Герман Тартыевка «Оройуон сайдыытыгар кылаатын иһин» бэлиэлэринэн наҕараадалаата.

Чурапчы сэлиэнньэтин баһылыгын солбуйааччы Алексей Егоров олохтоох полицияҕа сыаналаах бэлэх уонна астаапкаҕа сылдьар юстиция подполковнига, СӨ үтүөлээх юриһа Константин Платоновка наҕараада туттарда.

Истиҥ махталбытын тиэрдэбит, бу бэлиэ событиены олус үчүгэйдик тэрийбит олохтоох милииссийэ бэтэрээннэрин сэбиэтин бэрэссэдээтэлэ Дмитрий Евграфовка уонна СӨ ИДьМ-тын Бэтэрээннэрин сэбиэтин бэрэссэдээтэлэ Василий Местниковка.

Константин Платонов, СӨ үтүөлээх юриһа

Хаартыскалар: Мария Иванова, Чурапчы

+1
0
+1
0
+1
0
+1
0
+1
0
+1
0
+1
0