Чурапчытааҕы физкултуура уонна успуорт институтугар наука дэкээдэтинэн тэрээһиннэр ыытыллаллар.
«Наука уонна технология сыла Чурапчы улууһугар көхтөөхтүк саҕаланна. Маныаха биһиги институппут сыаллаах-соруктаах үлэни ыччакка ыытара үөрдэр. Бары тэрээһиннэр устудьуоннары түмэр, наукаҕа интэриэһи үөскэтэр, болҕомтону тардар, тирээн турар боппуруостарга дьүүллэһиини тэрийэр соруктаах ыытыллаллар«, — диэн улуус баһылыга Андрей Ноговицын бэлиэтиир.
Физкултуура уонна успуорт институтугар дэкээдэ олунньу ахсыс күнүттэн саҕаламмыта. Быйылгы ураты — тэрээһин онлайн эрэсииминэн ыытыллара буолар.
Дэкээдэ иитинэн билиини-көрүүнү кэҥэтэргэ анаммыт сэминээрдэр, устудьуоннарга уонна преподавателлэргэ туһуламмыт тэрээһиннэр, талыллан ылыллыбыт успуорт көрүҥүнэн тириэньэрдэргэ өрөспүүбүлүкэ таһымнаах сэминээрдэр, куйаар ситиминэн эрэгийиэннээҕи (улуустааҕы) «Аҕа ууһунан кэлэр өбүгэ ситимин генеология ньымаларынан билии киһи олоҕор суолтата» научнай-практическай кэмпириэнсийэ, уһуйааннарга Наука күнэ, устудьуоннарга психологическай дьиссипилиинэлэргэ олимпиада, «Успуорт — олох нуорумата» федеральнай бырагырааманы олоххо киллэриинэн научнай десаны тэрийии, Чурапчытааҕы физкултуура институтун ректора уонна СӨ успуорт уонна спортивнай уопсастыбаннас кыттыылаах «Успуорт — олох нуорумата» сүрүн куурустарга профессиональнай бэлэмнээһиҥҥэ кыттыыны ылыы тэриллэллэр. Бу күннэргэ «Применение портативного виброаппарата в тренировочном процессе» диэн маастар-кылаас уонна лиэксийэлэр ыытыллаллар.
Олунньу 19 күнүгэр «Физкултуураҕа уонна успуорка билиҥҥи кыһалҕалар уонна ыччат» диэн устудьуоннарга өрөспүүбүлүкэ таһымнаах научнай-кэмпириэнсийэ алтыс төгүлүн ыытыллара былааннанар. Наука дэкээдэтэ олунньу 20 күнүгэр түмүктэниэ.
+1
+1
+1
+1
+1
+1
+1