Тохсунньу 15-19 күннэригэр Чурапчы улууһун Чурапчы, Хатылы, Хайахсыт, Чакыр, Сылаҥ, Чыаппара нэһилиэктэригэр мэдиссиинискэй биригээдэ тиийэн үлэлии сылдьар.
Улахан мэдиссиинискэй биригээдэҕэ Уопсастыбаннай доруобуйа уонна ыарыыны сэрэтэр өрөспүүбүлүкэтээҕи киин, СПИД-ы утары охсуһар уонна сэрэтэр киин, онкология өрөспүүбүлүкэтээҕи киинин эмчиттэрэ бааллар.
Исписэлиистэр нэһилиэнньэҕэ ыарыыны сэрэтэр уонна бастакы сүһүөх анал көмөнү итиэннэ оройуоннааҕы киин балыыһа үлэтигэр методическай көмөнү оҥоруохтара.
СӨ Доруобуйа харыстабылын министиэристибэтэ иһитиннэрэринэн, Уопсастыбаннай доруобуйа уонна ыарыыны сэрэтэр өрөспүүбүлүкэтээҕи киин кылаабынай бырааһа А.М.Никитина Чурапчы улууһун дьаһалтатын кытары көрсөн, «Демография» национальнай бырайыак чэрчитинэн уопсастыба доруобуйатын тупсарарга эрэгийиэннээҕи бырагыраама олоххо киириитин дьүүллэһиэхтэрэ. Ковид-19 утары быһыы ылыы балаһыанньата эмиэ көрүллүөҕэ.
Исписэлиистэр нэһилиэнньэни кытары үлэлэрэ уонна да атын дьаһаллар инфекция тарҕаныытын бохсор миэрэлэри тутуһан ыытыллаллар.
edersaas.ru