Чурапчы улууһугар өрөспүүбүлүкэтээҕи “Сылгыһыт күнүн” көрсө «Маҕаайы» алааһыгар, киэҥ далааһыннаах тэрээһиҥҥэ сыспай сиэллээҕи иитэн, саха омук төрүт дьарыгын тарҕата сылдьар төһүү үлэһит дьону мунньан чиэстээтибит.
Быйылгы тэрээһин улууспут биир биллэр сылгыһыта, ССРС Судаарыстыбаннай бириэмийэтин лауреата, Төлөй нэһилиэгин, Чурапчы улууһун бочуоттаах олохтооҕо Михаил Семенович Толстоухов 90 сылыгар ананан ыытыллыбытынан олус уратылаах.
Тэрээһиҥҥэ Арассыыйа Федерациятын сенатора, Федерация Сэбиэтин аграрнай уонна ас-үөл бэлиитикэтигэр уонна айылҕаны туһаныыга кэмитиэтин бэрэссэдээтэлин солбуйааччы, биир дойдулаахпыт Егор Борисов, улуус баһылыга Степан Саргыдаев, улуустааҕы тыа хаһаайыстыбатын начаалынньыга Анжелика Неустроева кыттыыны ыллылар.
Түөрт түһүмэхтээх күрэхтэһиигэ барыта 6 хамаанда күөн көрсөн, көрөөччүлэргэ ыһыылаах-хаһыылаах түгэннэри бэлэхтээн, түмүк тахсыбыта, ол курдук:
«Ат күрэҕэр” муҥутуур кыайыылааҕынан Хоптоҕо нэһилиэгин хамаандата тахсан, от охсор тиэхиньикэнэн наҕараадаланна.
Иккис миэстэни — Болугур нэһилиэгэ (600 лиитэрэ сэлээркэнэн), үсүһү — Арыылаах нэһилиэгэ (20 куул эбиэс бурдугунан) ылан, ботуччу бириистээх бардылар.
Өссө 1200 миэтэрэҕэ ат сүүрдүүтэ буолла. Бу күрэхтэһиигэ хоптоҕолор бастаатылар. Кинилэргэ Михаил Толстоухов оҕолоро сыбааркалыыр аппарааты бириис туттардылар. Иккис миэстэ – Болугур. Кинилэргэ Төлөй дьаһалтата 10000 солк. сэртипикээт туттарда. Үһүс миэстэ – Одьулуун ТХПК, кинилэргэ Мындаҕаайы 20 куул эбиэс биэрдэ.
Ону тэҥэ, хомуур хапсаҕайа көрөөччүлэр сэҥээриилэрин ылла. Арыылаах нэһилиэгэ муҥутуур кыайыылааҕынан тахсан, бэтэринээринэй управление олохтообут бирииһин ылан үөрдүлэр-көттүлэр. Сылгыһыттарбытын бу курдук өрө көтөҕүллүүлээхтик чиэстээтибит.
А. Неустроева,
Чурапчы
Хаартыскалар ааптар тиксэриилэрэ.