Чурапчы нэһилиэгин сэттэ түөлбэтиттэн биир бастыҥнара “Куоҕалы” ТОС-ка кэнэҕэски ыччакка анаан холобур буолар саҥа сквер үөрүүлээхтик аһылынна.
Кэрэ-бэлиэ миэстэҕэ тэрилтэлэри, Аҕа Дойду улуу сэриитин, тыыл бэтэрээннэрин, Дьоруой ийэлэри, бочуоттаах олохтоохтору, көһөрүллүү кыттыылаахтарын о.д.а чулуу дьону үйэтитэр, үлэлэрин көрдөрөр истиэндэлэри туруордулар.
“Өр сыллаах туруорсуу кэнниттэн, дьоммут-сэргэбит өйөбүллэринэн биһиги, арҕаа бастар, кэтэһиилээх сквербит үлэҕэ киирбитинэн итиитик-истиҥник эҕэрдэлиибин”, – диир Чурапчы нэһилиэгин “Куоҕалы” түөлбэ салайааччыта Федора Самсоновна Седалищева.
Манна түөлбэҕэ баар тэрилтэлэри, Аҕа дойду Улуу сэриитин, тыыл бэтэрээннэрин, дьоруой ийэлэри, түөлбэ киэн туттар дьонун, ытык ыалларын, араас эйгэ үтүөлээх үлэһиттэрин, улуус, нэһилиэк бочуоттаах олохтоохторун, көһөрүллүү кыттыылаахтарын, үлэлээн ааспыт тэрилтэлэри, меценаттары көрдөрөр истиэндэлэр кэчигирэччи турбуттара сквер ис хоһоонун дириҥэтэр, байытар. Сквер иһэ толору сибэккинэн симэнэн, фонтан туруоруллубута үгүс киһини түмтэ.
Үөрүүлээх чааска РФ Федеральнай мунньаҕын Федерациятын Сэбиэтин тыа хаһаайыстыбатын, ас-үөл бэлиитикэтигэр уонна айылҕа баайын туһаныытыгар сис кэмитиэт бэрэссэдээтэлин солбуйааччы, СӨ бастакы Ил Дархана Егор Борисов, Чурапчы улууһун баһылыгын эбээһинэһин толорооччу Алексей Ноговицын, улуус дьокутааттарын Сэбиэтин бэрэссэдээтэлэ Афанасий Захаров, Чурапчы нэһилиэгин баһылыга Владимир Сивцев, СӨ Ил Түмэн государственнай мунньаҕын дьокутаата Михаил Гуляев кыттыыны ыллылар.
Түмүккэ түөлбэ салайааччыта Федора Седалищева: “Бу сквер тутуллуутугар биһиэхэ күүс-көмө буолбут дьоммутугар Мария Заболоцкаяҕа, Егор Борисовка, Дмитрий Ефимовка, Иван Федуловка, түөлбэм салайааччыларыгар Любовь Алексеевнаҕа, Оксана Ивановнаҕа, Мария Федоровнаҕа, Петр Лонгиновка, бэдэрээтчит Георгий Дьячковскайга дириҥник махтанабыт”, – диэтэ.
Түөлбэ олохтоохторо салгыы, үөрүүлэрин бэлиэтии Кыттайбан алааһыгар “Куоҕалы” ТОС ыһыаҕар айаннаатылар.
Семен Жендринскэй, «Саха сирэ» хаһыат, edersaas.ru саайтка анаан