Тохсунньу 4 күнүттэн Чурапчы улууһугар коронавируснай инфекцияны утары быһыыны биэрии бастакы түһүмэҕин саҕалаатылар. Ол туһунан улуус дьаһалтатын пресс-киинэ иһитиннэрдэ.
Улууска кэлбит “Гам-Ковид-Вак” вакцина, бастатан туран, “кыһыл зонаҕа” үлэлиир миэдиктэргэ, үөрэх уонна социалтнай эйгэ үлэһиттэригэр бэриллиэҕэ. Саха сиригэр вакцинация 2020 сыл ахсынньытыгар саҕаламмыта. Аан бастаан быһыыны миэдиктэр ылбыттара. Биһиги өрөспүүбүлүкэбитигэр маассабай вакцинация олунньуттан саҕаланыа диэн Ил Дархан Айсен Николаев этэн турар.
— Бу вакцина киһи олоҕор, доруобуйатыгар куттала суох. Биһиги, миэдиктэр, коранвирустан быһыыны ыларгытыгар ыҥырабыт, тоҕо диэтэр, улууспутугар, өрөспүүбүлүкэҕэ уодаһыннаах ыарыы тарҕаныытын быһыы эрэ тохтотуоҕа. Быһыы иккитэ бэриллэр: 21 хонук буолан баран, иккистээн ылыахха наада, оччоҕо эрэ үчүгэй түмүктээх буолар, — диэн улуус кылаабынай бырааһа Артем Ксенофонтов кэпсээтэ.
Санатар буоллахха, «Спутник V» (“Гам-Ковид-Вак”) быһыыны Арассыыйаҕа аан бастаан оҥорбуттара. Бу вакцинаҕа коронавирус геномун чааһын киһи аденовируһугар геннэй инженерия көмөтүнэн киллэрбиттэр. Бу киһиэхэ куттала суох аденовирус “өстөөх” генын илдьэ организмҥа киирдэҕинэ, иммунитет көмүскэнэн, “антитела” диэннэр үөскүүллэр, Т-килиэккэлэр күүһүрэллэр. Бу быһыы уратыта – икки араас аденовируснай вектордаах, онон быһыы иккитэ бэрилиннэҕинэ, көдьүүһүн улаатыннарар.
Быһыыны 18 саастарын туолбут, олоҕурбут ыарахан ыарыыта суох, кэнники 30 күн иһигэр атын быһыыны ылбатах уонна тумуулаабатах дьон ылар кыахтаахтар. Хат уонна оҕону эмтэрэр дьахталлар короанвирустан быһыыны ылаллара көҥүллэммэт.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.