Чурапчы улууһугар коронавируһунан ыалдьыы таһыма намтаан эрэрэ бэлиэтэнэр. Чурапчы улууһун баһылыгын бастакы солбуйааччы Степан Саргыдаев бу үтүө сибикини үөрэҕирии салаатын бары үлэһиттэрэ коронавируһу утары быһыыны ылбыттарын уонна үөрэнээччилэр кириип утары быһыыны ылбыттарын кытта сибээстиир.
Кини улуус олохтоохторун бэйэлэрин олохторун, чугас дьонун харыстаан, быһыыны ылар пууннарга тиийэн быһыы туруортаралларыгар ыҥырар.
“Уопсай иммунитет үөскээтэҕинэ эрэ хамсык иннинээҕи нус-хас олохпутугар төннөр кыахтаахпыт. Коронавируска сутуллан ыараханнык ыалдьан сытыахтааҕар, ол кэнниттэн ыарыы сыыстарыытыттан эрэйдэниэхтээҕэр, эрдэ-сылла вакцинанан харыстаммыт ордук,” — диир Степан Саргыдаев.
Хамсык саҕаланыаҕыттан Чурапчы улууһугар 3 319 киһи ыалдьыбыт, олортон 2 047 киһи үтүөрбүт диэн биллэрэр улуус дьаһалтата.
«Саха сирэ» хаһыат, edersaas.ru
Хаартыска sakha.gov.ru