Электроннай докумуоннары оҥоруу уонна нэһилиэктэр икки ардыларыгар интэриниэтинэн сибээстэһии Чурапчы улууһугар былырыын киллэриллибитэ.
edersaas.ru
Бүгүн ол үлэ көдьүүстээҕин уонна тупсаҕайын көрдөрдө. Ол курдук, улуус баһылыга Андрей Ноговицын нэһилиэктэри кытары видеосибээһинэн сүбэ мунньаҕы тэрийэн, олоҕу-дьаһаҕы хааччыйар эбийиэктэр штаттаах эрэсииминэн үлэлииллэрин эттэ, эрдэ былааннаммыт үлэлэри тэйиччиттэн тэрийэргэ, коронавирус дьаҥын таһаарбат уонна тарҕаппат туһуттан нэһилиэнньэҕэ өйдөтөр-сырдатар үлэни ыытарга сорудахтаата.
Улуустааҕы киин балыыһа кылаабынай бырааһа Артем Ксенофонтов коронавирус дьаҥын утары тэриллэр дьаһаллар тустарынан иһитиннэрдэ. Атын эрэгийиэннэртэн кэлбит 16 киһи бэйэни изоляцияланыы эрэсиимигэр олорор. Улуус үрдүнэн 75 куойкалаах обсерваторга миэстэ бэлэмнэммит.
Бу иннинэ Андрей Ноговицын улуус олохтоохторун харантыын кэмигэр сэрэтэр дьаһаллары тутуһарга, биир дойдулаахтары ытыктыырга ыҥырбыта. Ил Дархан Айсен Николаев дьаһалынан, Чурапчы улууһугар коронавирус дьаҥын тарҕаппат дьаһалы тэрийиигэ үрдүк бэлэмнээх буолуу эрэсиимэ биллэриллибитэ, суһал штаб тэриллибитэ диэн улуус дьаһалтатын пресс-киинэ биллэрэр.
Раиса Сибирякова, «Саха сирэ» edersaas.ru