Чурапчы улууһугар Аҕа дойдуну көмүскүүр сэрии кэмигэр көһөрүллүбүт дьон кэриэстэригэр Кутурҕан күнүн бэлиэтээтилэр.
78 сыллааҕыта Чурапчы оройуонун 41 холкуоһа күүс өттүнэн көһөрүллэн, хоту улуустарга балыктааһын үлэтигэр ыытыллыбыттара. 2 тыһыынчаттан тахса киһи хоргуйууттан, тоҥууттан-хатыыттан, ыарыыттан, ыарахан үлэттэн өлбүттэрэ диэн Чурапчы улууһун дьаһалтатын пресс-сулууспата иһитиннэрэр.
— Бу биһиги уопсай алдьархайбыт. Чурапчыга таарыйбатах ыала диэн суох. Билигин 108 киһи хаалла. Сыл аайы ахтабыт, саныыбыт. Быйыл грант сүүйэн, ол ыар сыллар тустарынан документальнай киинэ уһуллубут. Ол кинилэр ааттарын, үлэлэрин үйэтитэр туһугар ыытар үлэбит биир көстүүтэ, — диэн Чурапчы улууһун баһылыга Андрей Ноговицын эттэ.
Чурапчы сэлиэнньэтигэр Көһөрүллүү искибиэригэр турар “Ийэ уонна оҕо” пааматынньыкка венок уурдулар. Хатылыга Көһөрүллүү мусуойугар саҥа экспонаттары туттарыы сүрэхтээһинэ буолан ааста. Улуус социальнай ситимнэригэр “213 №-дээх уураах” диэн испэктээкил көрдөрүлүннэ. Ону тэҥэ, “Өйдөбүнньүк чүмэчитэ” онлайн-аахсыйа ыытылынна. Манна дьон көһөрүллүү кыттыылаахтарын, аймахтарын хаартыскаларын #чурапчыалдьархайа1942 диэн хэштег туруоран баран, социальнай ситимнэргэ киллэрдилэр.
Ангелина Васильева, “Саха сирэ” хаһыат, edersaas.ru