Чурапчыга улуус федерациятын бирииһигэр көҥүл тустууга өрөспүүбүлүкэтээҕи турнир ыытылынна. Күрэхтэһиигэ олимпийскай чөмпүйүөн, өрөспүүбүлүкэ сүүмэрдэммит хамаандатын сүбэлиир тириэньэрэ Хаджимурат Гацалов ыалдьыттаата.
Улуус баһылыга Андрей Ноговицын спортсменнары эҕэрдэлээтэ уонна улууска, өрөспүүбүлүкэҕэ көҥүл тустуу сайдарыгар кылааттара улаханын этэн туран ситиһиилэри баҕарда.
Күрэхтэһиигэ Саха сирин инники күөҥҥэ сылдьар тустууктара кытыннылар. Араас категорияҕа Арыйаан Тютрин, Семен Владимиров, Дмитрий Аксенов, Виктор Рассадин уонна Стив Попов кыайдылар.
57 киилэҕэ — бастакы миэстэ Арыйаан Тютрин, иккис Петр Копылов, үһүс Дархан Игнатьев, Айсиэн Винокуров;
61 киилэҕэ — бастакы миэстэ Семен Владимиров, иккис Петр Константинов, үһүс Уйгулаан Иванов, Яков Павлов;
65 киилэҕэ — бастакы миэстэ Дмитрий Аксенов, иккис Константин Капрынов, үһүс Дьулусхан Тотонов, Айхаан Антонов;
70 киилэҕэ — бастакы миэстэ Виктор Рассадин, иккис Айсен Потапов, үһүс Ньургустаан Иванов, Егор Захаров;
74 киилэҕэ — бастакы миэстэ Стив Попов, иккис Павел Яковлев, үһүс Алексей Захаров, Николай Сивцев.
Турнир иннинэ Хаджимурад Гацаловы Чурапчы нэһилиэгин бэлиэ сирдэрин сырытыннардылар, олимпийскай чөмпүйүөн Павел Пинигин төрөөбүт нэһилиэгэр Дириҥҥэ ыалдьыттаата. Кини тириэньэр Дмитрий Петрович Коркин мусуой-дьиэтин, олимпийскай өрөгөй 45 сыллаах хаартысканан быыстапкатын көрдө-иһиттэ. Итиэннэ интэринээт-оскуола үөрэнээччилэрин, физкултуура уонна усупорт институтун устудьуоннарын кытта көрүстэ.
Турнир кэмигэр Арассыыйатааҕы уонна норуоттар икки ардыланыыҕа күрэхтэһиилэргэ ситиһиилээхтик кыттыбыт Чурапчыттан төрүттээх Тимур Пестеревы, Николай Аянитов-Ноевы, Виталий Корякины, Владимир Флегонтовы, Александр Оконешниковы, Станислав Захаровы чиэстээтилэр.
Чурапчы улууһун дьаһалатын пресс-сулууспата.
Хаартыскалары пресс-слусспа тиксэрдэ.