Чэбдигирии сылынан Чурапчы улууһун олохтоохторун доруобуйатыгар болҕомто өссө күүһүрдэ.
Маныаха чэгиэн-чэбдик буолууга туһуламмыт тэрээһиннэр тиһиктээхтик ыытыллаллар диэн улуус дьаһалтатын пресс-киинэ иһитиннэрдэ. «Үлэ сүрүнэ мэдиссиинэ өҥөтө үрдүк хаачыстыбалаах буоларыгар уонна дьон-сэргэ көрдөрүнэр кыахтанарыгар туһуланар. Биһиги бэйэбит уонна чугас дьоммут доруобуйаларыгар улахан болҕомтобутун ууруохтаахпыт», — диир улуус баһылыга Андрей Ноговицын. Бэлиэ сыл чэрчитинэн Чурапчы улууһун балыыһатын иккис куорпуһун тутуу саҕаламмыт. Балыыһа национальнай бырайыактар испииһэктэригэр киллэриллибит. Бу тутууну олохтоохтор сүүрбэ сыл күүппүттэр.
Балыыһа кылаабынай бырааһа Артем Ксенофонтов иһитиннэрбитинэн, улуустааҕы киин балыыһаҕа нэһилиэнньэҕэ искэн ыарыыны эрдэттэн билэр, сэрэтэр туһуттан, «Онкопоиск» аахсыйа ыытыллыбыт. Бу күннэргэ «Эрэлим – эрчимнээх илиигэр, дьолум – эйэҕэс мичээргэр» диэн кинигэ сүрэхтэниитэ куйаар ситиминэн олус сэргэхтик ыытыллыбыт. Кинигэ СӨ Доруобуйа харыстабылын үтүөлээх уонна туйгун бырааһа, үрдүк категориялаах хирург, уһулуччу үтүөкэн киһи Василий Гоголев олоҕор, үлэтигэр анаммыт.
«Чэбдигирии сылыгар маннык кинигэ тахсыбыта ордук үөрүүлээх, долгутуулаах. Антонина Иннокентьевна кэргэнин В.А.Гоголев улахан мэтириэтин улууспут киин балыыһатын түмэлигэр үтүөлээх быраастар мэтириэттэрин галереятыгар бэлэхтээтэ. Улууспут хирурдара Василий Андреевич хирургия уобалаһыгар биэрбит тэтимин ыһыктыбакка үлэлииргэ кыһаллаллар», — диэн Артем Михайлович бэлиэтиир уонна ааттаах-суоллаах улахан хирург өрөспүүбүлүкэҕэ бастакынан бэйэтин үлэтигэр суһал мини холецистоэктомияны туттубутун, ол кэлин өрөспүүбүлүкэҕэ тарҕаммытын ыйар.
Олунньу 25 күнүгэр Чурапчыга Чэбдигирии сылынан үөрүүлээх тэрээһин ыытыллара былааннаммыт.