Чурапчы сэлиэнньэтигэр киин уулуссаҕа баар дьиэлэри гаас ситимигэр холбоон саҕалаатылар. Бу туһунан Чурапчы улууһун баһылыгын солбуйааччы Алексей Егоров иһитиннэрдэ диэн Чурапчы дьаһалтатын пресс-киинэ тиэрдэр.
Баһылыгы солбуйааччы иһитиннэрэринэн, дьиэни гааска холбуурга икки судаарыстыбаннай бырагыраама баар — үлэ министиэристибэтин лиинийэтинэн субсидия көрүллүүтэ уонна бырамыысыланнас, геология министиэристибэтин лиинийэтинэн дьиэ кэргэн дохуотуттан тутулуга суох киин ититииттэн көһүү.
«Микро-оройуон олохтоохторо «Сахатранснефтегаз» ситимигэр холбоноллоругар техусулуобуйалары ылалларыгар сүбэлиибит», — диэн Алексей Егоров этэр.
Бүгүҥҥү күҥҥэ номнуо икки дьиэ гааска холбонно. Бу бырайыак Саха сиригэр «2020-2025 сылларга тыа сирин сайыннарыы» судаарыстыбаннай бырагыраамата олоххо киириитинэн оҥоһуллар. Инникитин өссө 421 дьиэ күөх төлөҥҥө холбонуоҕа.