Чурапчыга энтузиаст, кулутуура туйгуна, СӨ үтүөлээх үлэһитэ, бочуоттаах үлэһит, үлэ бэтэрээнэ, Чурапчы көһөрүллүүтүн кыттыылааҕа Василий Николаевич Дьячковскай көҕүлээһининэн былыргы миэлиҥсэни сөргүттүлэр.
«Сигиир» миэлиҥсэни Кытах диэн Уһун Күөл нэһилиэгиттэн үс км тэйиччи сытар алааска оҥордулар. Маны көҕүлээччи Василий Николаевич Дьячковскай сотору 85 сааһын туолар. Кини төһө да аҕам саастаах буоллар, бэйэтин үбүнэн түөрт ый иһигэр миэлиҥсэни сөргүппүтэ ыччакка холобур уонна устуоруйа быһыытынан хаалар тустаах. Аҕам саастаах киһи миэлиҥсэни сөргүтэригэр уола, сиэннэрэ уонна биир дойдулаахтара төһүү күүс буолбуттар. Бу Кытах диэн сиргэ, сэрии иннинэ да, кэнниттэн да Василий Николаевич хайдах үлэлээбитин умнубат.
Улуус норуодунай дьокутааттарын Сэбиэтин бэрэссэдээтэлэ Афанасий Захаров култуура управлениетын уонна А.А.Саввин аатынан этнография мусуойун үлэһиттэрин кытта үөрүүлээх быһыыга-майгыга Василий Николаевич Дьячковскайга ууну көтөҕөр миэлиҥсэни саҥардыбытын иһин улуус дьаһалтатын аатыттан махтал суругу уонна Арасыыйаҕа пааматынньыктары харыстыыр, сөргүтэр уопсастыба аатыттан грамотаны туттардылар.